هاوكات لەگەڵ هەوڵەكانی ئەمریكا بۆ گەڕاندنەوەی ئێران بۆسەر مێزی وتووێژە ناوكییەكان، كۆماریخوازانی ئەمریكا لە كۆنگرە گەڵاڵەیەكیان بۆ كورتكردنەوەی دەسەڵاتی بایدێن بۆ خەرجكردن لە بەشی بەرگریی وڵات ئامادە كردووە كە ئیزن بە دەوڵەت نادات بە هیچ شێوەیەک پارە بدات بە ئێران و بایدێن پێش ئەوەیكە بیهەوێ هەركام لە گەمارۆكان لەسەر ئێران لا ببات، دەبێت بە ڕوونی ڕاپۆرتەكەی بدات بە كۆنگرە.
بەپێی ئەم گەڵاڵەیە دەوڵەتی بایدێن دەبێ سەبارەت بە لابردنی گەمارۆكان، كردەوە و هەڵسوكەوتی ڕێژیمی ئێران لە خاكی ئەمریكا، هاوكاری نیزامیی ئێران لەگەڵ چین ڕوونكردنەوە بدات بە كۆنگرە.
كۆمیتەی توێژینەوەی كۆماریخوازەكان كە گەورەترین ئەنجومەنی حیزبی كۆماریخوازانە لە كۆنگرەی ئەمریكا چەند بەشێكی بە گەڵاڵەی بووجەی ساڵانەی ئەمریكا زیاد كردووە كە دەستی بایدێن لە هەناردەكردنی پارە بۆ ئێران كورت دەكاتەوە.
ئەم گەڵاڵە هەروەها داوا لە دەوڵەتی بایدێن دەكات كە سەبارەت بە هەڵوەشاندنەوەی گەمارۆكانی سەر ئێران، بە تەواوی ڕوونكردنەوە بدات.
