دوایین جەمخانەی ڕێڕەوانی ئایینیی یاری “ئەهلی حەق” لە شائاباد كەوتە بەر پەلاماری كۆمەڵێكی یەكجار زۆر لە توندڕەوە ئاینییەكان.
بەپێی ڕاپۆرتی هێرانا ڕۆژی ٨ی ڕەشەممە، چەندسەد كەس كە خۆیان بە شیعەكانی پێڕەوی ویلایەت ناو بردوە، هێرشیان كردە سەر جەمخانەی یارسانییەكان لە شاری شائاباد لە پارێزگای كرماشانو شووشە و پەنحەرەكانی ئەم پەرستگەیان وەبەر دار و بەرد داوەو زیانێكی زۆریان بەو شوێنە گەیاندووە.
لەم ڕاپۆرتەدا هاتووە كە پەلاماردەرەكان لە لایەن هێزە ئەمنیەتییەكانەوە و مەئموورەكانی پۆلیسەوە پشتیوانیان لێ دەكرا و بە گوتنەوەی دروشمی جۆراوجۆت بەدژی یارسانییەکان، هاواریان دەكرد كە “دەبێ ئەم تاقمە گومڕایە لەنێو بچێ.”
هاوكات لەگەڵ پەلاماردرانی پەرستگەی شائاباد، ئەم هاووڵاتییە یارسانییانەش كە ناڕەزایەتییان دەردەبڕی دەكەوتنە بەر لێدانو كوتانی پەلاماردەرانو بە خراپترین شێوە بەرپەرچیان دەدانەوە.
بەوتەی شایەتحاڵەکان، ئەم كەسانە ئازادانەو بە بەربڵاوی لە نێو شاردا دەسووڕانەوەو بە ئیشتیای خۆیان سووكایەتییان بە یارسانییەكان دەكرد.
تا بەر لە شۆڕشی ساڵی ١٣٥٧ لە ئێران، كۆمەڵێكی زۆر لە یارسانییەکان دانیشتووی شاری شائاباد بوون، بەڵام پاش هاتنە سەر كاری كۆماری ئیسلامیو دەسپێکردنی زەبروزەنگی سیستماتیکی کۆماری ئیسلامی، ژمارەیەکی زۆر لەوان بە ناچاری ئەم ناوچەیان چۆڵ كردو بەرەو باشووری كوردستان كۆچیان كرد. هەروەها زۆربەی پەرستگەكانی یارسانییەکانی ئەم شارەش لە لایەن دەستوپێوەندییەکانی كۆماری ئیسلامییەوە خاپوور كران.
هێزهکانی سهر به ناوهنده ئهمنیهتییهکانی ڕێژیم ههروهها به دروستکردنی سمێلی دهسکردو دهمهلاسکهی یارسانهکان سووکایهتییان پێکردوون.
شایانی باسە دوو ساڵ لەوە پێش لە ماوەی چەند مانگدا ٣ كەس لە پێڕەوانی ئایینی یارسان بە ناوەكانی حەسەن ڕەزەوی، نیكمەرد تاهیری و محەممەد قەنبەری بۆ ناڕەزایەتی دەربڕین بە نیسبەت هەڵاواردن و هەڵسوكەوتی پڕ لە سووكایەتی لە بەرامبەر ئەم كەمینە ئایینییەدا، خۆیان سووتاند، ئەم ڕووداوە پاش ئەوە بوو كە لە زیندانی هەمەدان بە زۆر سمێڵی زیندانییەكی یارسانیان تاشی، ئەم هەوڵەش سووكایەتییەكە كە بە دابو دەستووری پێڕەوانی ئەم ئایینە كراوە.
ئەهلی حەق یا یارسان، ئایینێكە بە ڕێوڕەسمی عیرفانیی تایبەتەوە كە حەشیمەتییان لە ئێران نزیكەی 2 میلیۆن كەس بەراورد كراوەو زۆربەیان لە كوردستان و باكووری ڕۆژاوای ئێران نیشتەجێ بوون
