‎سەمای مەرگ!

دەشنێتەوە دەلەرێتەوە بەسەر گیانمدا،

‎شەممەی سووری خوێناوی

‎برینی قوڵی جەستەی قەڵا

‎ئامان و قەراری لێ بردووم

‎من لەژێر زامی درەوشاوەی ئەواندا

‎ئەوان

‎ وەک قەڵای بڵیندی ئازادی

‎ ماومەتەوە!

‎تک تک خوێنی ئاڵی ئەوانم بەرکەوتووە

‎بۆنی ھەناسەی هەڵوەریوی ئەوان

‎لە من جیا نابێتەوە

‎

من

‎پایزانیش هەر چرۆی سەور دەر دەکەم چرۆی سەوز

‎هەر بەو ھەناسە

‎لەژێر پیرە قەڵای دێموکراتا

‎سەمای مەرگ دەمخاتە سەر شانی ڕاستی

‎خەوێکی قووڵ دەمباتەوە

 

 

‎لەبیرم دێ شەممەی پێرار پار پەڵەهەورێکی شل و مات،

‎بەسەر بەژنی قەلای بڵیند و شاردا

‎دەست و پەنجەی هەڵتەکاندن.

‎هەر ئەوکاتە

‎نیگای قەڵام خوێنی سووری لێ‌دەچۆڕا

‎شاریک لە شەونمی خوێن

‎قفڵ‌ڕێژ کرا

‎مەرگ بەسەر  هەنگاوەکانی ئەواندا

ڕاوەستابوو

‎پەنجەی جێماو و پێڵاوی بێمرادی ئەوان

‎لەژێر خۆڵدا  ون کرابوو

‎هەر ئەوکات بوو ڕووناکی لە سپیدە یاخی بوو

‎ئەوکات بوو ئەوکات!

‎کۆترەکان لەسەر منار مردن نیشتنەوە

‎ئەوکات تۆ پێت وابوو

‎کۆماری پەتی سیدارە

‎تەیرەکانی ئەو بنارە

‎ باڵەکانیان پەڕپەر دەبن،

‎نامێننەوە

‎چەند داماوی خانە وێران!

‎ئەوان ڕەگی پیرەدارن

‎لێرەش نەبن

‎لەژێر خاکدا

‎بە تازەیی دەمێننەوە

 

‎ماوەتەوە!

‎بەسەر سەکۆی قەڵای پڕ هەگبەی ئازادی

‎خوێنی ئاڵی ئەسیرەکان!

‎بسکی شانەنەکراوی شۆڕە ژنانی نێو خەبات

‎بۆتە بلوانەی ملم

‎بۆ خەوی قووڵی مردنیش

‎دای ناکەنم لە گەردنم

 

‎منیش لێرە چیم لەدەست دێ

‎جگە لە بیرەوەریی  نێو دەروازەی پیرە قەڵا،

‎بیری پێکەنینی سەوز و جوانتان

‎بیری  جانتاکەی شانتان

‎تفەنگی جیماوتان

‎بیری ئێوە، ئێوەی لە نمەی شەونم پاکتر

‎لە ڕوحی خودا سپیتر.

‎چیم لەدەست دێ بۆ ئیوە

‎تەنهاو بێڵم

‎ئەمن قەڵای دێموکراتی کۆچی سووری پاییزانم

‎لە ساباتی پڕ لە برینی ئەم جارەمدا

‎بەسەر خال و خۆڵی هەڵتەکاودا

‎جارێکی تر چرۆ دەکەم دەژێمەوە،،

‎وەک گوڵاڵە سوورەی هەمیشە

‎لەبن بەژنی تەوارەکانی ئازادی دەمێنمەوە.

‎من ئیرادەی شۆڕشێکم

‎سەدان هەزار جۆگەلەی خوێنی داوە

‎من خەیاڵی قەد بڵیندی ڕێبازێکم

‎لەنێو قورگی هەژاراندا

‎ڕەگ و ڕیشەی لە خاک ناوە.