خۆبەپیرۆز کردنی نیزامێکی حکومەتی بە پڕۆپاگندەی نێوپێکهاتەیی کە بەردەوام بە باڵای خۆیدا هەڵدەڵێ، یەک لە تایبەتمەندییەکانی کۆماری ئیسلامیی ئێرانە.
لە جەرگە و کەفوکوڵی شۆڕشی گەلانی ئێراندا ئەوەی پتر لە هەموو شتێک دەبیسترا ڕێزگرتن لە پلەوپایە و کەرامەتی مرۆیی بوو، خومەینیش هەم لە پاریس و هەم لە ڕۆژەکانی یەکەمدا زۆر لەسەر ئەم بابەتە دەڕۆیشت. وادە و بەڵێنی بە باق‌وبریق لە زمان پیرەپیاوێکەوە کە بە تاقە چەند مانگ ژیان لەنێو دڵی ئورووپادا توانی بە زیرەکیی خۆی و بە زارەکی ئەم وانە هەڵخەڵەتێنەکانی دێموکراسی و کەرامەتی مرۆڤ بەباشی لەبەر بکا و بیانکا بە پێخۆری تەبلیغاتی.
دوای سەرکەوتنی شۆڕش و سەرکوتی نەیارانی سیاسی و جێ‌خستنەوەی دامەزراوە حکوومەتییەکان، بەرەبەرە لە ناوەندی وڵات خەریک بوو سەقامگیرییەک بۆ دەسەڵاتی مەلاکان پێک بێ کە شەڕی هەشت ساڵە لەگەڵ دراوسێی ڕۆژئاوا هاوکێشەکانی لەم وڵاتەدا گۆڕی. سەرهەڵدانی ناکۆکییەکان و بەهێزبوونی سپای پاسدارانی تازەدامەزراو و ناوەندە ئەمنەتییەکانی هاوتەریب قورسایی دەسەڵاتی وڵاتی بە لای میلیتاریزمدا شکاندەوە، بەمجۆرە لە هەمان ساڵەکانی دەسپێکەوە سپای پاسداران هەم لە پێکهاتەی دەسەڵاتدا جێی گرت و هەم وەک مافیایەکی سیاسی، ئەمنییەتی و ئابووری لە نێوخۆی وڵات و ناوچەشدا کەوتە جموجۆڵ. سەرکوتی دژبەرانی ڕێژیم، تێرۆر و لێدان لە جووڵانەوەی ڕزگاریخوازی و هەرچەشنە ماف‌ویستییەک بۆ سپای پاسداران لە سەرووی هەموو ئەرکەکان و بەشێک لە جینایەتە پیرۆزەکانیان! بوو.
کۆماری ئیسلامی بەڵام بۆ داپۆشینی تاوان و جینایەتەکانی و بە ڕووی دەرەوەدا پێویستیی بە ڕوتووشی ڕوخسارە دزێوەکەی هەبوو، بۆیە لەو شانۆگەرییەدا بۆ ساڵانێکی دوور و درێژ دیپڵۆماسیی ئەم ئەرکەیان بە یەکێک لە برایانی لاریجانی دا کە لە نواندندا هەتا بڵێی شارەزا بوو. بەمجۆرە محەممەد جەواد لاریجانی ساڵانێکی دوورودرێژ بە سیگارە بەرگە بەناوبانگەکەی و لە بەرگی لایەنگری مرۆڤایەتی و مافەکانیدا خۆی دەنواند و ئەرکەکەشی شووشتنەوەی تاوان و جینایەت و ئەو خوێنانە بوو کە کۆماری ئیسلامی ڕشتبوونی. ئەو لە دەرکەوتن و وتووێژ و لێدوان بۆ مێدیاکاندا ڕواڵەتێکی هیندە پاک و بەشەردۆستی لە کۆماری ئیسلامی وێنا دەکرد وەک بڵێی کۆماری ئیسلامی و خومەینی یەکەم مەنشووری جیهانیان لە بواری مافەکانی مرۆڤدا نووسیبێ! بە ژێستی ڕووناکبیری و لەوپەڕی ڕووهەڵماڵاویدا لە لۆبییەکانی دەرەوەدا هەوڵی دەدا قورسایی هاوکێشەکان لە بەرژەوەندیی ڕێژیمە خوێنرێژەکەی بشکێتە و کۆمەڵگەی جیهانی سەبارەت بە هەموو تێرۆر، ئێعدام، جینایەت، کوشتار، گرتن و ئەشکەنجەی دژبەرانی ڕێژیم لە نێوخۆ و دەرەوەی وڵات لە خشتە بەرێ. ئەم ئەرکە پیرۆزە! ساڵانێکی زۆریش لەئەستۆی محەممەد جەواد زەریف بوو کە هەر لە ڕووداوی بەردانەوەی فڕۆکە ئۆکراینییەکە و لە وتووێژە لەهەڵڵادراوەکەیدا خۆی گوتەنی: “پێمان بڵێن چی بووە هەتا بتوانین لە پێوەندییەکانمان لەگەڵ وڵاتاندا پینەپەڕۆی بکەین”…
ڕۆژ هات و ساڵ ئاوا بوو و بە تێپەڕینی کات دەمامکەکان لەسەر کۆماری ئیسلامی لادران. کورد گوتەنی بەری خۆر بە بێژینگ ناگیرێ، بۆیە تەمەنی درۆ و فریو و دەغەڵییەکانی ئەم ڕێژیمە بەسەر چوو. لە دەرەوەی وڵات لە زۆر دادگا و کۆڕوکۆبوونەوەی سیاسی و مافی مرۆڤدا مەحکووم و ڕیسوا کرا، لە نێوخۆی وڵاتیشدا زۆر هەڵمەت و کەمپەین بۆ ئەو مەبەستە وەڕێ خرا هەتا ئەمجارەیان گرووپی “عەداڵەتی عەلی” بوون کە ئەم ڕێژیمە و کاربەدەستەکانی ئەم حکوومەتەیان بە جارێک سووک و چرووک کرد و کوتکی دادپەروەرییان لە دەسەڵاتە هڵۆلەکەی سەید عەلی وەشاند. ئەو وێنانەی لە کامێرای زیندانەکانی ئیڤینەوە هەڵگیران و بۆ هەموو کەلێن و قوژبنی دنیا نێردران، ڕاستییەکان و پیس و پڵۆخیی هەناوی ئەم ڕێژیمەی کە ساڵانێک بوو هەوڵی شاردنەوە و جوانکردنی دەدرا ئاشکرا کرد. هەمووان ڕوخساری دزێوی جەلادە کورتەباڵاکەی زیندانی “وەکیل‌ئاباد”یان بینی کە لە شاباشی کوشتنی “نەوید ئەفکاری”دا کرابوویە بەرپرسی گشتیی زیندانی ئیڤین… .
ڕەوتی مێژووی مرۆڤایەتی و بەسەرهاتی نەتەوە و دەسەڵاتەکان پێمان دەڵێن خەنجەری دادپەروەری نە ژەنگ دێنێ و نە لە کالاندا ئۆقرە دەگرێ. ئەم خەنجەرە بەسەبرە، بەڵام کە ڕۆژی هات بەزەبرە. وەک چۆن ئێستا وەک بەڵایەک بۆ سەر دەزگای گەندەڵ و جینایەت‌پیشەی بەناو دادی ڕێژیم نازڵ بووە و خەریکە دەیهاڕێ.
