جاناتان ئێسپایر دەڵێ: سپای پاسدارانی ڕێژیمی ئێران و میلیشیاکانی سەر بەو ڕێژیمە لە عێراق بە گوشار خستەسەر هێزەکانی ئەمریکا دەیانهەوێت سیناریۆی خێرا چوونەدەرەوەی ئەمریکا لە ئەفغاستان بۆ عێراقیش دووبارە بکەنەوە.
بەرپرسی دامەزراوەی” لێکۆڵینەوە لە ڕۆژهەڵاتی ناوەڕاست” جاناتان ئێسپایر، لە ڕاپۆرتێکدا کە لە ماڵپەڕێکی ئوستراڵیایی ڕۆژی سێشەممە٢٦ی گەلاوێژی ١٤٠٠ی هەتاوی، بڵاوبووەتەوە دەڵێ: ڕێبەرانی ڕێژیمی ئێران و گرووپە میلیشیاکانی سەر بەو ڕێژیمە گەیتشوون بەو ئاکامەی کە ئەمریکا توانای شەڕە بەردەوامەکانی ڕۆژهەڵاتی ناوەڕاستی نەماوە و دەیانهەوێت بە گوشار خستنە سەر هێزەکانی ئەمریکا لە عێراق و سووریە، ئەمریکا ناچار بکەن وەکوو ئەفغانستان ئەو دوو وڵاتەش بەجێبهێڵێ.
بەوتەی ئەو شڕۆڤەکار و لێکۆڵەرە سیاسییە، میلیشیاکانی سەر بە ڕێژیمی ئێران لە عێراقدا لە ژێر ناوی ئەحزابی سیاسیی چالاکیی دەکەن و هێزە سەربازییەکانیان بۆ بەرەوپێشچوونی ئامانجە سیاسییەکانیان بەکار دێنن.
جاناتان ئێسپایر لە درێژەدا دەڵێ: میلیشیاکانی سەر بە ڕێژیمی ئێران لە عێراق ئەم شێوە سیاسەتەیان لە سپای پاسدارانی ڕێژیمی ئێران وەرگرتووە و دەیانهەوێت بە بەدەستەوە گرتنی دەسەڵاتی سیاسیی لە بەغدا دەوڵەتی عێراق بکەنە ژێر دەستەی ڕێژیمی ئێران.
سپای پاسدارانی ڕێژیم بەکەڵک وەرگرتن لەم شێوەکارە لە ڕێگای حیزبوڵای لوبنانەوە توانیویە دەسەڵات لە لوبنان بە دەستەوە بگرێ و لە ئاکامدا لە ڕێگەی حیزبوڵاوە لوبنان تووشی کێشە و گرفتی زۆری ئابووری، سیاسیی و کۆمەڵایەتیی بکا.
