بەرپرسی راگەیاندنی حیزبی دیموکراتی کوردستان، بەشداریکردنو نەکردنی خەڵکی رۆژهەڵاتی کوردستان لە هەڵبژاردنەکانی ئێران، بە مافێکی سرووشتی خەڵک دەزانێو دەڵێ دەبێ لە بازنەی بایکۆتو بایکۆت نەکردن بێینە دەرێ.
عومەر باڵەکی، بەرپرسی راگەیاندنی حیزبی دیموکراتی کوردستان، لەکاتی بەشداریکردنی لە بەرنامەی رووداوی ئەمڕۆی رادیۆ تەلەڤزیۆنی رووداو، لەبارەی هەڵوێستی حیزبەکانی رۆژهەڵاتی کوردستان لەبارەی هەڵبژاردنی گشتی ئێران رایگەیاند:خەڵکی کوردستان بەتایبەتی و خەڵکی ئێران بە گشتی بەشداریی هەڵبژاردنەکان بکەنو نەکەن، مافی خۆیانە.
عومەر باڵەکی، گوتی: ئێمە پێمان وایە حیزبی سیاسی بەتایبەتی حیزبەکانی رۆژهەڵاتی کوردستانو حیزبی دیموکراتی کوردستان دەبێ لە بازنەی بایکۆت و بایکۆت نەکردن بێنە دەرێ. ئەو لەبارەی هەڵوێستی حیزبی دێموکڕاتی کوردستان لەبارەی هەڵبژاردنەکانی ئێران گوتی لە هەڵوێستە رەسمییەکەی ئێمەدا، خەڵک سەرپشککراوە، بۆ نموونە لەو شوێنانەی پێی وایە ئەو کاندیدانەی سەر بە کۆماری ئیسلامین خەڵک نەچێتە سەر سندووقەکانو بایکۆتی بکا، لەو شوێنانەش کە کاندیدێک هەیە خۆش ناوو بەغیرەتو ئازایە، با سەر بە حیزبی دیموکراتی کوردستانیش نەبێو سەر بە هیچ حیزبێکی سیاسی نەبێ، بەڵام ئەو ئازایەتییەی تێدایە کە بتوانێ باسی پرسەکانی ناوچەکەیو پرسی کورد بکا، با خەڵک پشتی بگرێ.
بەرپرسی راگەیاندنی حیزبی دیموکراتی کوردستان دەڵێ پێویستە پرۆسەی هەڵبژاردنو فەزای هەڵبژاردن لێک جیا بکرێتەوە، ئێمە بەداوی فەزای هەڵبژاردندا دەگەڕێین، دەمانەوێ خەڵکی کورد لە فەزای هەڵبژاردن باشترین کەڵک وەربگرێ بۆ ئەوەی داواکانی خۆی بێنێتە گۆڕێ، بەڵام لە پرۆسەی هەڵبژاردندا کۆماری ئیسلامی ویستەکانی خۆی تێدا دێنێتەدی، بەڵام فەزای هەڵبژاردن فەزایەکە ئێستا کراوەتەوە و خەڵک ئیستفادەی خۆی لێدەکا، با ئێمە ئەو فەزایە نەگرینو ڕێگە لە خەڵک نەگرین کە ویست داخوازییەکانی خۆی بێنێتە گۆڕێ.