لەم هاوارە پڕ لە بێدەنگییە
قەڵەمێک بزووت
تفەنگێک هاواری لێ هەستا
باڵندەیەک بەسەر تەرمی بێکەسیی شەقاما ڕاما
گوڵێک بەدەم ڕەشەبای کۆیەوە ژاکا
خوێن بە دەمارەکانی شارەوە مەییەوە
ئیتر چریوەی چوولەکەیەک بەدەم پاسارەوە دەمرێ
گەرمەشینە
چەمەڕایە
بوار باران لە کۆیە گەرمەشینە
بوار باران لە بێستوون گەرمەشینە
سوار و سەرسواران لێرە چینە
هاواررررررررە
هاواررررررە
کرماشان و ئیلام داخدارن
سنە چاوەڕوانی تەرمێکی لە خوێن گەوزاوە
ئاویەر چەمەری بۆ داڵاهۆ دەخوێنێ
وشە خۆی دەداتە دەست گێژاوی گریانەوە
شێعر لە هەرمانێکی هەتاییەوە سەیری بێکەسیمان دەکا
بێکەسیش بێکەسمان دەکا
بەجێمان دێڵێ
دەمانداتە دەست تۆڵەوە
تۆڵەیەکی دیلی مافی مرۆڤ
ئاخخخخخخ تۆڵە
ئاخخخخخخ تۆڵە
چەندە نەبووی هێندە تامەزرۆت دەکەم
هەزار ئاواتمان بە نەبوونتەوە بە خاک ئەسپارد
هەزار شیوەنمان بە چاوەڕێیەتەوە نەخشاند
وەرە لەم دووڕێیانە قەتیس ماوم
لە نێوان ئاو و ئاگردا خەریکە دەخنکم
هاتنت لە حەزرەتی دێموکراسی وەبەرترە
پێش دێموکراسی ئاوپڕژێنی ماهیدەشت بکە
تەرمێکی ئەشکەنجەکراو لە ڕێیە
با تۆز لەسەر ئاواتە پەمەییەکانی نەنیشێت
با برینەکانی نەکولێتەوە
وەرە با چیرۆکێکی خەماویت بۆ بخوێنمەوە
کوا شەمشەمەکوێرە چاوی بە ڕووناکی هەڵ دێ؟
کوا لە خۆزگەی دڵی گوڵەبەڕۆژە دەگا؟
ئێمە گوڵەبەڕۆژەی ئەم دارستانەین
خەون بە ڕۆژەوە دەبینین
ئەوانیش خەون بە ئەشکەوتی نماوی و تاریکەوە
گەلێک ساڵە پەیامی ئەشکەوتمان بەسەردا دەڵێنەوە
گەلێک ساڵە بە وادەی حووریی و کانیاوێکی شەراب
پەلاماری سینگی پڕ لە گڕی نیشتمانمان دەدەن
ئێمە لەگەڵ هەتاو دەچینە جێژوان
ئەوان لە باوەشی تاریکیدا نوقم دەبن
زرێبار وریا بە
تەرمێکی تینووی ئازادی بەڕێوەیە
لە پەنای گۆڕەکەی دەروێش با بحەسێت
تەرم نییە نزای نیشتمانێکی بێکەسە
ئاسمان بە دەم هاوارەکانییەوە بڕۆ
ئاویەر مەنوو میوانێکی لە غوربەت گەڕاوت بۆ هاتووە
دەمێکە شنەبایەک ڕۆحی ماندووی نەلاواندووە
بیدەنە دەست پیرشالیارەوە
با تەڵقینێکی کوردانەی بدا
بیداتە دەست بێستوونەوە هەتا بێ ستوون نەبێ
با ئیلام و لوڕستان لە ڕاچڵەکێنێ
هەتا شاخۆشین سروودی حەماسەتی دایە زەڕاری بۆ بڵێتەوە
خاک دەمێکە تامەزۆری گەڕانەوەیەتی
دەیەوێ پڕ گەروویەک بەسەریا بگریت
کرماشان ئامان، تاقەوسان ئامان
ڕۆڵەتان گەوزاوی خوێنە
لە باوەشی بگرن، بیلاوێنن
هەتا هەڵاتنی خۆری ئازادی بیلاوێنن
