فەرماندەی حەشدی شەعبی عێراق لە چاوپێکەوتنێکدا لەگەڵ حوسێن سەلامی فەرماندەی سپای پاسدارانی ڕێژیمی ئێران وتی: ئێمە دەمانهەوێت سپای پاسداران وەکوو نموونە و سەرباشقەی خۆمان لە بەڕێوەبەریی عێراقدا بەکار بێنین.
بەپێی ڕاپۆرتی هەواڵدەریی ئیرنا، ڕۆژی یەکشەممە ١٧ی گەلاوێژی ١٤٠٠ی هەتاوی، فالح فەیاز، فەرماندەی حەشدی شەعبی عێراق لە چاوپێکەوتنێکدا لەگەڵ حوسێن سەلامی فەرماندەی سپای پاسدارانی ئێران، ڕایگەیاندووە کە ئێمە پێویستمان بە هاوکاری سپای پاسداران بۆ بەڕێوەبەری و سەقامگیری عێراقە و “سەلامی”ش لەم چاوپێکەوتنەدا وتوویە کە حەشدی شەعبی گرووپێکی جیهادییە و جەختی لەسەر ئەوە کردۆتەوە کە ئێران قسەکانی لە مەیداندا دەکا و هێزی سیاسیی هێزی مەیدانییە.
سەلامی، سەرەڕای ئاماژە بەوەیکە حەشدی شەعبی لە مەیداندا هێزێکی بەهێز و جیهادییە وتی: سپای پاسداران بەردەوامە لە پشتیوانیکردنی حەشدی شەعبی.
فەرماندەی سپای ئێران، بە ئاماژە بە ئەو گوشارگەلەی کە حەشدی شەعبی خستویەتە سەر بنکە و بارەگاکانی ئەمریکا لە عێراق وتی: ئەم هەوڵانەی حەشدی شەعبی ئەمریکای لە عێراق لاواز کردووە و ئەگەر بیانهەوێت لە عێراقدا بمێننەوە ئەو بەردەوام ڕووبەڕووی مەترسی دەبنەوە و ئەگەریش لە عێراق بچنەدەرەوە ئەوە ئەمریکا تووشی شکستێکی گەورە دەبێ.
جێگای ئاماژەیە کە فەرماندەی سپای پاسدارانی ڕێژیمی ئێران، شەوی شەممە لەگەڵ “نەعیم قاسم، جێنشینی حیزبوڵای لوبنان، چاوپێکەوتنی کردووە و بەڵێنی پشتیوانیی ئێرانی لە حیزبوڵای لوبنان دووپات کردۆتەوە.