مورتەزا مەحموودوەند، نوێنەری خوڕەمئاوا، لەهەمبەر ناڕەزایەتییەکانی پارێزگای خووزستان بەهۆی کەمی ئاوی خواردنەوە، هوشداری بە بەرپرسانی ڕێژیم دەدا و دەڵی: دەبێ زۆر بە خێرایی کێشەی پارێزگای خووزستان چارەسەر بکرێ.
مورتەزا مەحموودوەند، نوێنەری خوڕەمئاوا و بەرپرسی کۆمیتەی ئاسایشی ئاو لە کۆمیسیۆنی ئاسایشی نەتەوەیی و سیاسەتەکانی دەرەوەی مەجلیسی ڕێژیم، ڕۆژی شەممە ١٦ی گەلاوێژی ١٤٠٠ی هەتاوی، سەرەڕای ئاماژە بە بارودۆخی هەستیاری پارێزگای خووزستان و سەرهەڵدانەوەی خۆپیشاندانە ناڕەزایەتییەکان وتی: ئێستا بارودۆخەکە لەو پارێزگایە زۆر هەستیارە و ئەگەر بەرپرسانی باڵای وڵات چارەسەرێک بۆ کێشەکانی ئەو پاریزگایە نەبیننەوە ئەو ڕووداوگەلێکی نەخوازراو دێتە ئاراوە کە بە قازانجی وڵات نییە.
ناوبراو بەجەختکردنەوە لەسەر ئەوەیکە لە داهاتوویەکی زۆر نزیکدا ئاو لە نەوت گرینگتر دەبێ و دەبێتە باسێکی زۆر گرینگ و هەستیار لە نێوان داڕشتنی سیاسەتەکانی وڵاتانی دەرەوە و کێشەیەکی زۆر بۆ کۆمەڵگەی نێونەتەوەیی ساز دەکا هەر بۆیە دەبێ بەرپرسانی ئێران بە خێراترین کات، پرسی کەمئاوی پارێزگای خووزستان چارەسەر بکەن.
