لە کۆتایی ئەنجامەکانی کۆنکوری ئەمساڵ کە ڕۆژی دووشەممە، ڕێکەوتی ١١ی گەلاوێژی ١٤٠٠ی هەتاوی ڕاگەیەندرا. بەخۆشیەوە قوتابیان لە پارێزگاکانی کوردستان بەرزترین پلەکانیان وەدەست هێناوە و لە ڕیزبەندی یەکەمەکاندا ناویان تۆمار کراوە. سەرەڕای ئەو دۆخەی کە لە ماوەی نزیک بە دوو ساڵی ڕابردوودا بە هۆی پەتای کرۆناوە باڵی بەسەر تەواوی جیهاندا کێشاوە و نیشتمانەکەمان کوردستانیشی گرتۆتەوە، قوتابیان ناچار بوون لە ماڵەوە و بە شێوەی ئۆنلاین درێژە بە خوێندن بدەن و سەرەڕای دۆخی خراپی ئینتێرنێت لە ئێراندا و هەروەها بارودۆخی ئابووری و زۆر کێشەی دی کە بەرۆکی وڵاتەکەمانی گرتووە و هەموومان ڕۆژانە لە ئێراندا دەیانبینین، بەڵام کچان و کوڕانی وشیاری نیشتمانمان توانیان بە سەر ئەو بەربەستانەدا زاڵ بن و بە سەرکەوتوویی یەکێک لە هەستیارترین قۆناغەکانی خوێندن ببڕن و پێ بنێنە نێو قۆناغێکی دی لە پرۆسەی خوێندن کە ئەویش چوونە زانکۆیە.
بەخۆشیەوە ڕێژەی مامناوەندی قوتابیانی سەرکەوتووی کورد لە پارێزگاکانی کوردستان لەچاو پارێزگاکانی تری ئێران باشترین نمرەکانیان بەدەست هێناوە و خۆیان بۆ چوونە زانکۆ ئامادە کردووە.
یەکیەتیی نەتەوەیی خوێندکارانی کورد بە پێویستی دەزانێ بەبۆنەی سەرکەوتنی قوتابیانی سەرکەوتووی کورد لە تاقیکاریی کۆنکور لە ئاست و پلەی باڵادا سەرکەوتنیان بەرز بنرخێنێ و پیرۆزبایی خۆی ئاڕاستەی قوتابیانی سەرکەوتوو و بنەماڵەکەیان و سەرجەم کۆمەڵی کوردەواری بکا و هیوای سەرفەرازیی پتریان بۆ بەئاوات بخوازێ.
بێگومان کچان و کوڕانی خوێندکار باش دەزانن کە زانکۆ بۆ لاوانی کورد تەنیا شوێنی خوێندن نییه، بەڵکوو گۆڕەپانێکه بۆ دەنگ‌هەڵبڕین و ناساندنی چاند، کولتوور، وێژە و ئەدەبیات و شوناسی نەتەوەکەمان. بۆیە هەر تاکێک لە ئێوە خوێندکاران پێویسته و دەتوانن ببنە نوێنەری میللەتەکەتان و بە هزر و ئەندێشەی “سمایل شەریفزادە ” زانکۆ بکەنە مەکۆی ئازادیخوازی.
لە کۆتاییدا بۆ جارێکی دیکە پیرۆزبایی لە سەرجەم کوڕان و کچانی تازە خوێندکاری نیشتمانەکەمان دەکەین و هیوای سەرکەوتنی زیاتریان بۆ بە ئاوات دەخوازین.
یەکیەتیی نەتەوەیی خوێندکارانی کورد
١٣ی گەلاوێژی ١٤٠٠ی هەتاوی
