دوو هاووڵاتیی سووتەمەنیبەری بەلووچ لە جاددەی میناب_بەندەرعەباس بەهۆی ڕووداوی هاتوچۆ گیانیان لەدەستدا.
بەپێی راپۆرتی کەمپەینی چالاکانی بەلووچ ڕۆژی یەکشەممە ١٠ی گەلاوێژی ١٤٠٠ی هەتاوی لە ئاکامی پێکدادانی تانکرێکی نەوتهەڵگر و ماشینێکی سووتەمەنیبەری بەلووچ لە جاددەی میناب_ بەندەرعەباس دوو هاووڵاتیی بەلووچ بەهۆی ئاگرتێبەربوونی ماشینەکەیان گیانیان لەدەستدا و تائێستا ناسنامەی ئەو دوو هاووڵاتییە ئاشکرا نەبووە.
بەپێی ئەو ڕاپۆرتە پاش پێکدادانی هەر دوو ماشینەکە ئاگریان تێبەردەبێ تا کاتی گەیشتنی تیمی ئاگر کوژێنەوە بۆ شوێنی ڕووداوەکە ئەو دوو هاوڵاتییە بەلووچە گیانیان لە دەستدەدەن.
کەمپەینی چالاکانی بەلووچ بە ئاماژە بە باروودۆخی قورس و دژواری بژێوی هاووڵاتیانی بەلووچ و بێکاریی لەو پارێزگایە دەڵێ: خەڵک بێکار و بێدەرەتانی بەلووچ بەهۆی بێکارییەوە ڕوودەکەنە پێشەی سووتەمەنیبەریی کە هەموو ڕۆژێک ڕووبەڕووی مەرگ دەبنەوە، ڕۆژێک هێزە چەکدارەکانی ڕێژیم بە تەقە دەیانکوژن، ڕۆژێکیش بەهۆی وەرگەڕان و پێکدادانی ماشینەوە گیانیان لەدەستدەدەن.
