وەزارەتی دەرەوەی ئەمریکا، هێرشی میلیشیا حووسیەکانی سەر بە ڕێژیمی ئێرانی لە ڕۆژانی جێژنی قورباندا بۆ سەر خاكی عەرەبستان بە توندیی مەحکووم کرد.
دەفتەری وەزارەتی دەرەوەی ئەمریکا، شەوی دووشەممە ٤ی گەلاوێژی ١٤٠٠ی هەتاوی بەدەرکردنی بەیاننامەیەک سەرەڕای مەحکوومکردنی هێرشی میلیشیا حووسییەکانی سەر بە ڕێژیمی ئێران بۆ سەر خاکی عەرەبستان ڕایگەیاند کە میلیشیا حووسییەکانی یەمەن هۆکاری ناسەقامگیری و ئاژاوەن لە یەمەن و ناوچەکە بە گشتیی و دەبێ کۆتایی بە کردەوە تێرۆریستییەکانی بێنێ و لە ڕێگای وتووێژ و ئاشتییەوە لەگەڵ دەوڵەتی یاسایی یەمەن بگا بە ڕێککەوتن.
هەر لەم پێوەندییەدا دەوڵەتی یاسایی یەمەن لە چەند ڕۆژی ڕابردوودا ڕایگەیاندووە کە ئەرتەشی ئەو وڵاتە لە هێرش‌گەلێکی بەردەوامدا بۆ سەر میلیشیا حووسییەکانی سەر بە ڕێژیمی ئێران، گورزێکی کاری و خەسارێکی گەورەی گەیاندووە بەو گرووپە میلیشیایە.
