ناوەندی ژنانی کوردستانی ڕۆژهەڵات لە ڕاگەیەندراوێکدا پشتیوانیی خۆی لەناڕەزایەتییەکانی خەڵكی خووزستان ڕاگەیاند.
لەو ڕاگەیەندراوەدا هاتووە:ماوەی زیاترلە هەفتەیەكە لە چەندین شارو ناوچەی پارێزگای خووزستان خۆپیشاندانو ناڕەزایی دژی نەبوونی سەرەتایی ترین پێداویستیەکانی ژیان وەک ئاو و کارەبا دەستی پێكردوە و ڕێژیمی سەرکوتگەری کۆماری ئیسلامی ئەمجارەش سەرەڕای لەرزۆکی پەیکەرەی خۆی هەوڵی سەرکوتی ئەو دەنگە مافخوازانەی خەڵکی ناڕازی داوە و تا ئێستا بە پێی هەواڵەکان رێژەیەکی زۆر بە تەقەی ڕاستەوخۆی هێزەچەکدارەکانی ڕێژیم بە داخەوە گیانیان لەدەستداوەو ژمارەیەكی زۆریش دەسبەسەر كراون.
كۆماری ئیسلامی بە درێژایی تەمەنی خۆی هەموو ناڕەزاییو خۆپیشاندانێكی خەڵكی بەشێوەیەكی دڕندانە سەركوت كردوە، ئەمجاریش لە رێگەی زەبرو زەنگو تەقەكردن هەوڵ بۆ بێدەنگ كردنی دەنگی ناڕەزایی خەڵک دەدا.
لەئێستادا ناڕەزایەتییەکان گەیشتۆتە شارەکانی کرماشان، ئیسفهان و بوشێهر و پشتیوانییەکی زۆریش لە خەباتی خەڵکی خووزستان دەبیندرێت و رۆڵی بەرچاوی ژنانی خووزستان و چالاکانی ژنی ئێرانیش حاشا هەڵنەگرە و ئەمەش لە ڕەوتی خەباتی ئێستادا گرنگ و چارەنووس سازە.
لە کتاییدا هاتووە :ناوەندی ژنانی کوردستانی رۆژهەڵات، پشتیوانی خۆی لە خۆپیشاندانی خەڵكی ناڕازی پارێزگای خوزستان و سەرجەم داوا رەواكانیان دەكا
