ڕێبەری ڕەوتی سەدر دەڵێ: هێرشەکانی ئەم دواییانەی میلیشیاکانی سەر بە ئێران بۆ سەر فڕۆکەخانەی نێودەوڵەتی هەولێرو بەرژەوەندییەکانی ئەمریکا، بۆتە هۆی زیاتر بوونی هێزە بیانییەکان لە عێراق.
بەپێی راپۆرتی هەواڵدەرییەکانی عێراق، موقتەدا سەدر، ڕێبەری ڕەوتی سەدر، ڕۆژی دووشەممە ٢١ی پووشپەڕی ١٤٠٠ی هەتاوی بە ڕەخنەگرتنی توند لە هێرشی مووشەکیی بۆ سەر هێزەکانی ئەمریکا لە عێراق وتی: هێرشی میلیشیاکانی سەر بە ئێران بۆ سەر فڕۆکەخانەی نێودەوڵەتیی هەولێر کە شوێنی نیشتەجێبوونی هێزەکانی ئەمریکایە بۆتە هۆی زیاتربوونی هێزەکانی ئەمریکا لە عێراقدا و پاش هێرش بۆ سەر بەرژەوەندییەکانی ئەمریکا، هێزە بیانییەکان لە عێراقدا ژمارەیان گەیشتوەتە ٤هەزار کەس.
سەدر لە دریژەدا وتی: ئەو کەس و گرووپانەی کە بەرژەوەندییان تەنیا لە هێرش کردنە سەر هێزەکانی ئەمریکا دەبیننەوە، لە باری سیاسییەوە هیچ نین و تەنیا ئاژاوەگێڕن.
ناوبراو لە درێژەدا ڕایگەیاند بەهۆی نەبوونی سەربەخۆیی سیاسیی لە عێراقدا پاش گۆڕینی ئەو هەموو دەوڵەت و پارلمانە، باروودۆخی ئابووری، سیاسیی و ئەمنیەتیی عێراق ڕۆژ بە ڕۆژ لاوازتر دەبێ.
