ئەندامێكی پلەبەرزی “پارتی یەكیەتیی دێمۆكراتیك “ی سووریە دەڵێ توركیە ئەم مافەی نیە دەست لە كاروباری نێوخۆی سووریە وەربدا. هێزە كوردییەكان لە ڕۆژاوای كوردستان دەڵێن توركیە لە جێگای ئەوەی لە سووریە تێرۆریستەكانی داعش بكاتە ئامانجی پەلامارەكانی خۆی، هەڵدەكوتێتە سەر بنكەو بارەگاكانی هێزە كوردییەكان.
“پارتی یەكیەتیی دێمۆكراتیك”ی سووریە وریایی ئهوهی داوە كە خەڵكی سووریە لە بەرامبەر هەرچەشنە دەستێوەردانێكی توركیە لە وڵاتەكەیان دەوەستنەوە. ساڵح موسلیم لە لێدوانێكدا بۆ ڕۆیتێرز ڕایگەیاندووە كە توركیە ئەم مافەی نییە خۆی لە كاروباری نێوخۆیی سووریە هەڵقورتێتێنێ. ساڵح موسلیم لە هەمان كاتدا گوتویەتی ئەم بنکه ئاسمانییهی ڕۆژی شەممە ئەرتەشی توركیە هێرشی كردۆتە سەر، پێشتر لە بەر دەستی بەرەی نوسرە (لقی ئەلقاعیدە لە سووریە)دا بووە، بەڵام حەوتووی ڕابردوو ئەم بنکهیه كەوتۆته بەر دەستی هاوپەیمانەكانی پارتی یەكیەتیی دێمۆكراتیكەوە.
ئەرتەشی توركیە لە ڕۆژی شەممەوە دەستی بە پەلاماردانی چەند شوێنێكی باكووری سووریەی كردوەو ڕۆژی یەكشەممەش بۆ دووهەمین ڕۆژ بەبێ پسانەوە، هێرشی كردۆتە سەر بنكەو بارەگای هێزە كوردییەكان لە باكووری وڵاتی سووریە. لە ڕەوتی ئەم پەلامارانەدا هەر نەبێ 2 كەس لە ئەندامەكانی هێزەكانی پارتی دێمۆكراتیكی سووریە كوژراون.
ئەرتەشی توركیە لە حاڵێكدا درێژە بەم هێرشانە دەدا كە ئامریكا، وەك هاوپەیمانی دەوڵەتی ئانكارا، داوای لە توركیە كردوە كۆتایی بەم هێرشانە بۆسەر كوردەكانی ئەو بهشهی كوردستان بێنێو وزەی خۆی بۆ ڕووبەڕوو بوونەوە لەگەڵ تێرۆریستەكانی داعش تهرخان بکا.