رۆبێرت پالادینۆ، کۆنسوڵی نوێی ئەمریکا لە هەرێمی کوردستان ڕایگەیاند وڵاتەکەی خوازیاری کوردستانێکی بەهێزە.
ڕۆژی یەکشەممە ٢١ی پووشپەڕی ساڵی ١٤٠٠ی هەتاوی لە سەلاحەددین، لە میانەی دیداری بەرپرسانی هەرێمی کوردستان لە گەڵ رۆبێرت پالادینۆ، کۆنسوڵی نوێی ئەمریکا لە هەولێر،ناوبراو رایگەیاند وڵاتەکەی خوازیاری کوردستانێکی بەهێزە.
بەپێی راگەیێندراوی کۆبوونەوەکە لە دیدارەکەدا، کە رۆبێرت والەر کۆنسوڵی پێشوی ئەمریکا لە هەولێر ئامادە بوو، بارودۆخی سیاسی عێراق و ناوچەکە و هەڵبژاردنەکانی داهاتووی عێراق و پڕۆسەی سیاسیی هەرێمی کوردستان تاوتوێ کران.
لەو دیدارەدا کۆنسوڵی نوێی ئەمریکا جەختی لەوە کردووەتەوە، کە وڵاتەکەی خوازیاری هەرێمی کوردستانێکی بەهێز و یەکڕیزە و، ئەمریکا هەردەم ڕێزی بۆ ئیرادە و خۆڕاگریی گەلی کوردستان هەبووە، راشیگەیاندووە کە ئەمریکا بە نیگەرانییەوە سەیری دۆخە سیاسی و ئەمنییەکانی عێراق دەکات.
