جیمز ئینهاف دەڵێ: میلیشیاکانی سەربە ڕێژیمی ئێران لە عێراق و سووریە هەڕەشەن بۆ سەر بەرژەوەندییەکانی ئەمریکا و دەبێ زۆرتر ڕووبەڕوویان ببینەوە.
جیمز ئینهاف، سێناتۆری کۆماریخواز و ئەندامی باڵای کۆمیتەی هێزە چەکدارەکان لە مەجلیسی سێنای ئەمریکا لە بەیاننامەیەکدا ڕۆژی سێشەممە ٨ی پووشپەڕی ١٤٠٠ی هەتاوی، سەرەڕای دەبڕینی ڕەزامەندیی خۆی بۆ هێرشەکانی ڕۆژی یەکشەممەی ئەرتەشی ئەمریکا بۆ سەر مۆڵگەکانی میلیشیاکانی سەر بە ڕێژیمی ئێران لە عێراق وسووریە وتی: دەبێ هێرشەکانمان بۆ سەر ئەو هێزە تێکدەرانە کە بەرژەوەندییەکانی ئەمریکا دەخەنە مەترسییەوە زیاتر بێ و ئیزن بە دەستێوەردانەکانی ئێران لە ناوچەکەدا نەدەین.
ئینهاف لە بەیاننامەکەدا هەروەها ڕایگەیاندوە کە هێرشی بەردەوامی میلیشیاکانی سەر بە ڕیژیمی ئیران بۆ سەر بنکە سەربازیی و ناوەندە دیپلۆماتیکەکانی ئەمریکا قەبووڵ ناکرێ و دەبێ وڵامی خێرای سەربازییمان هەبێ و هەبوونی میلیشیاکانی سەر بە ڕێژیمی ئیران لە عێراق وسووریە بەردەوام مەترسیە بۆ سەر بەرژەوەندییەکانی ئەمریکا لەو وڵاتانە و بە گشتیی هەموو ناوچەکە.
لەدرێژەی بەیاننامەکەدا ئینهاف ڕەخنە لە دەوڵەتی جۆبایدێن دەگرێ و دەڵێ: نابێ ئەمریکا لەگەڵ وڵاتێکی تیرۆریست وەکوو ئێراندا بچێتە نێو ڕێککەوتنێکەوە و بوژاندنەوەی رێککەوتنی بەرجام هیج دەسکەوتێکی بۆ ئەمریکا نابێ بەڵکوو ڕێژیمی ئیران زیاتر سەرەڕۆ دەکا.
