فواد حوسێن، لەهەمبەر پێوەندییەکانی عێراق و ئێران وتی: پێوەندی عێراق و ئێران پێوەندی نێوان دوو وڵاتی دراوسێیە و بڕیاردان لەسەر بارودۆخی عێراق لە بەغدا دەدرێ نە لە پێتەختی وڵاتێکی دیکە.
فواد حوسێن، وەزیری دەرەوەی عێراق ڕۆژی سێشەممە ١ی پووشپەڕی ١٤٠٠ی هەتاوی، لە وتووێژێکدا لەگەڵ هەواڵدەریی ئەلعەرەبییە، سەرەڕای جەختکردنەوە لە سەر ئەوەی کە ئیزن نادەین وڵاتانی دراوسێ دستێوەردان لە کاروباری نێوخۆیی عێراق بکەن وتی: ئێمە لەگەڵ وڵاتانی دراوسێ پێوەندیمان هەیە بەڵام هیچ وڵاتێک بۆی نییە بڕیار لە سەر کاروباری عێراق بدا.
ناوبراو لە درێژەدا وتی: ئێمە هێندێک کێشەمان لەگەڵ وڵاتانی دراوسێ هەیە و خەریکین لە ڕێگەی وتووێژەوە کێشەکانمان چارەسەر دەکەین.
وەزیری دەرەوەی عێراق بە ئاماژە بە وەی کە ئەمنییەتی عێراق بەشێکە لە ئەمنییەتی ناوچەکە و ئورووپا وتی: لەگەڵ وەزیرانی ئورووپایی لە هەمبەر پشتیوانیی سیاسیی، ئەمنییەتی و ئابووری و ئیستراتیژیک لە وڵاتی عێراق قسەمان کردووە و وەزیرانی دەرەوەی وڵاتانی ئورووپایش بەڵێنی هاوکاری و پشتیوانییان پێ‌داوین.
جێگای ئاماژەیە کە ڕێژیمی ئێران بە پشتیوانیی ماڵی و چەکوچۆلی گرووپە میلیشیاکانی سەر بە تاران، عێراقی تووشی ناسەقامگیری کردووە و ئەم گرووپانە کە لە دەرەوەی چوارچێوەی یاسای عێراق چالاکی دەکەن، تاوانبارن بە کوشتنی ڕوناکبیران و چالاکانی مەدەنیی عێراق و هێرش بۆ سەر بنکە سەربازییەکانی ئەمریکا و هاوپەیمانان لە عێراقدا.
