هێزی دەریایی ئەمریکا توانای کەشتییە فڕۆکەهەڵگرەکانی لە ئاست تەقینەوە گەورەکانی کاتی شەڕ تاقیدەکاتەوە و لەو چوارچێوەیەشدا بۆمبێکی ١٨ تۆنی تاقیکردەوە.
هێزی دەریایی ئەمریکا بۆمبێكی ١٨ تۆنی لە دەوروبەری کەشتیی فڕۆکەهەڵگری “جێرالد فۆرد” لە زەریای ئەتلانتیک تەقاندەوە و لە ئەنجامدا کەشتییەکە بەبێ هیچ زیانێک لە تاقیکردنەوەکە دەرباز بوو.
تاقیکردنەوەکە لە چوارچێوەی ئەو پلانەیە کە وەزارەتی بەرگریی ئەمریکا دایناوە، تاوەکوو ئاستی ئامادەیی سەربازیی وڵاتەکەی لە ئەگەری سەرهەڵدانی شەڕ هەڵبسەنگێنێت.
ئەنجامدانی ئەو تاقیکردنەوە لە کاتێکدایە ئیدارەی بایدێن لە هەڵکشانی سەربازی و ئابووریی چین نیگەرانە و هاوپەیمانیی ناتۆش نیگەرانە لە نزیکبوونەوەی هێزی سەربازیی چین لە ئاست هێزی سەربازیی وڵاتانی ناتۆ.
