فەرامەرز گومشادزێهی، مێرمنداڵی تەمەن ١٧ ساڵان لەلایەن چەند چەکدارێکی نەناسراوەوە لە خاش کوژرا.
بەپێی ڕاپۆرتی کەمپەینی چالاکانی بەلووچ، ڕۆژی هەینی ٢٨ی جۆزەردانی ١٤٠٠ی هەتاوی، چەند کەسێکی چەکداری نەناسراو شەوی هەینی، دەکەونە شوێن فەرامەرز و کەسێکی دیکە و پێیان دەڵێن کە ئێمە مەئمووری هێزە ئینتیزامییەکانین و پاش دەسبەسەرکردنیان دەیانبەنە جاددەی خاش- سەراوان و لەوێ فەرامەرز گومشادزێهی دەکوژن و هاوڕێکەی فەرامەرز بێهۆش دەکەن و شوێنەکە بە‌جێ دێڵن.
سەرچاوەیەکی ئاگادار لەم پێوەندییەدا بە کەمپەینی چالاکانی بەلووچی ڕاگەیاندووە کە پاش ئەوەی کە دەست ولاقی فەرامەرز دەبەستنەوە بە سێ گوللـە ناوبراو دەکوژن.
چالاکانی مەدەنیی بەلووچ ڕایانگەیاندووە کە سپای پاسدارانی ڕێژیم بۆ خۆی چەکوچۆڵ لەنێو خەڵکدا بڵاو دەکاتەوە و بە دووبەرەکیی سازکردن لەنێو خەڵکی بەلووچدا، هۆکاری سەرەکیی کوشتنی هاووڵاتییانی بەلووچە.
