وەزارەتی پەروەردە و بارھێنانی ئێران بە بڕیارێک دژایەتیی خۆی بۆ گەڕانەوە بۆ سەرکاری مامۆستایەکی کورد دەربڕی و لەکارەکەی دووری خستەوە.
بەپێی ڕاپۆرتی سهرچاوه نێوخۆییهکان، داوای مەسعوود کوردپوور مامۆستای قوتابخانە دواناوەندییەکانی بۆکان و مەھاباد لەلایەن وەزارەتی پەروەردە و فێرکردن بە فەرمی ڕەت کراوەتەوە. ڕەتکردنەوەی ئەو داوایە کە ڕێکەوتی ٢٤ی خەزەڵوەڕی ئەمساڵی لەسەرە، لەلایەن نوێنەری وەزیری پەروەردە و فێرکردن، بۆ دهفتهری کاروباری مهجلیس نێردراوە. ئەو مامۆستا و رۆژنامەنووسە کوردە، لە کاتی دەستبەسەرکردن و حوکمی دادگادا، سزای کڕینەوەی (باز خرید) کارەکەی، لە وەزارەتی پەروەردە و بارھێنانی بەسەردا سەپێندرا.
کڕینەوەی کاری ئەو مامۆستایە، خەمڵاندنی مووچەکەی بە ٤٥ ڕۆژ لە ساڵێکدا بووە. لە نامەی بەڕێوەبەری گشتیی نووسینگەی ھاوئاھەنگیی لێژنەکانی بەدواداچوون بۆ سەرپێچییە ئیدارییەکان، کە لەلایەن ماڵپەڕی “سخن معلم”ەوە بڵاو کراوەتەوە، ھاتووە کە؛ داواکاریی مەسعوود کوردپوور پێشتر لەلایەن دادگای سەرەتایی و پێداچوونەوەی دیوانی دادپەروەریی ئیداریی وەزیرەوە ڕەت کراوەتەوە.
داواکاریی ئەو مامۆستایە بۆ گەڕانەوەی بۆ وانەکانی خوێندن، پاڵپشتیی چالاکانی مەدەنی و فەرھەنگیی کوردستان و ھەروەھا چەندین نوێنەری کوردی مهجلیسی بەدواوە بووە. مەسعوود کوردپوور رێکەوتی ٧ – ٣ -٢٠١٣، لەلایەن ئیدارەی ئیتلاعاتی شاری مەھابادەوە دەستبەسەر کراوە. ناوبراو لە دادگای سەرەتاییدا، بە تاوانی “کۆبوونەوە و ھاودەستی کردن دژ بە حکوومەتی ئێران” بە ٣ ساڵ زیندان و بە تۆمەتی “پڕوپاگەندە لەدژی حکوومەت” بە ٦ مانگ زیندان و سەرجەم بە ٣ ساڵ و نیو زیندان حوکم درا، کە لە کۆتاییدا، دادگای پێداچوونەوەی پارێزگای ورمێ، کۆی ماوەکەی بۆ ٣ ساڵ کەم کردەوە. ئەو چالاکە مەدەنییەی کورد، ٢٢ی مانگی سەرماوەز (سەرەتای ساڵی ٢٠١٥) لە زیندان ئازاد کرا…