بەرهەم ساڵح، سەرۆککۆماری عێراق: دەستێوەردانە سەربازییەکانی تورکیە لە باکووری عێراق، پێشێلکردنی سەروەریی خاکی عێراقە و دەبێ هێزەکانی تورکیە خاکی عێراق بەجێبهێڵن.
بەپێی ڕاپۆرتی هەواڵدەریی “عێراق” لەدرێژەی بۆردوومانی ناوچە سنوورییەکانی هەرێمی کوردستان لەلایەن هێزەکانی تورکیەوە، بەرهەم ساڵح سەرۆککۆماری عێراق، ڕۆژی یەکشەممە ١٦ی جۆزەردانی ١٤٠٠ی هەتاوی لە بەیاننامەیەکدا بە جەختکردنەوە لە سەر ئەوەی کە دەستێوەردانی سەربازیی تورکیە پێشێلکردنی سەروەریی خاکی عێراقە وتی: دەبێ بە زووترین کات هێزەکانی تورکیە خاکی عێراق بە جێبهێڵن.
بەرهەم ساڵح لە درێژەی بەیاننامەکەدا جەختی لەسەر ئەوە کردەوە کە عێراق نابێتە مەیدانی شەڕ بە دژی وڵاتانی دیکە و لە هەمان کاتدا ئیزن نادا سەروەریی وڵاتەکەی لەلایەن هێزێکی سەربازییەوە بچێتە ژێر پرسیار.
ناوبراو بە ئاماژە بە هێرشی هێزی سەربازیی تورکیە بۆ سەر کەمپی مەخمور لە باکووری عێراق وتی: ئەو هێرشە زۆر مەترسیدارە و پەناخوازانی لە عێراقدا ڕووبەڕووی مەترسی زۆر کردۆتەوە و ئەم کارەی ئەرتەشی تورکیە پێشێلکردنی ڕوونی هەموو یاسا نێونەتەوەییەکانە لەهەمبەر مافی پەناخوازان.
