لەگەڵ پەرەسەندنی گرژی و ئاڵۆزییەکان لە نێوان دەوڵەتی عێراق و میلیشیاکانی حەشدی شەعبی، هێزی تایبەتی ئەرتەشی عێراق لە ناوچەی سەوزی بەغدا جێگیر کراون.
دوابەدوای هەنگاوی هێزە ئەمنییەکانی دەوڵەتی عێراق لە دەسبەسەرکردنی “قاسم مەحموود موسلیح”، بەرپرسێکی میلیشیاکانی حەشدی شەعبی لە پارێزگای “ئەلئەنبار”، گرژی و ئاڵۆزییەکانی نێوان میلیشیاکانی حەشدی شەعبیی سەربە کۆماری ئیسلامی، لە بەغدا پەرەی سەندووە و گرژییەکان هەروەها ڕوولە زیاد بووندایە.
لە هەمانکاتدا “جومعە عەنادین سەعدوون” وەزیری بەرگریی عێراق، لەبارەی پەروەندەی “موسلیح” وتی: ناوبراو دوای دەسبەسەرکردنی ڕادەستی ناوەندی کاری هاوبەش کراوە و کۆمیتەیەکی هاوبەش لە نوێنەرانی دامەزراوەکانی ئەمنیەتی، ئەرتەش، وەزارەتی ناوخۆ و حەشدی شەعبی خەریکی لێکۆڵینەوەن.
وەزیری بەرگریی عێراق، لەبارەی شەڕی داعشەوە ڕەخنەی توندی لە پڕوپاگەندەی حەشدی شەعبی گرت و وتی؛ ئەوانەی وا پێیانوایە کە پاراستنی عێراق لە شەڕی داعش بێ بوونی میلیشیای حەشد نەدەکرا زۆر هەڵە دەکەن، لەبەر ئەوەیکە ئەرتەش ڕۆڵی سەرەکی لەبەرانبەر داعشدا هەبوو و بێ هێرشی ئاسمانی هیچ سەرکەوتنێک دەستەبەر نەدەکرا و بوونی میلیشیای حەشد هیچ ڕۆڵێکی کاریگەری نەبوو و تەنیا بۆ بەرژەوەندیی خۆیان هەوڵیانداوە.
