ئاگرتێبەردانی کونسوولخانەی ئێران لە کەربەلا

بەدوای تێرۆرکردنی ئەیهاب ئەلوەزنی، چالاکی عێراقی، لەلایەن گرووپە میلیشیاکانی سەر بە ڕێژیمی ئێرانەوە، ناڕەزایەتیی‌گەلێک بەدژی ڕێژیمی ئێران دەستیپێکرد و لە ئاکامدا خەڵکی ناڕازی کونسوولخانەی ئێرانیان لە کەربەلا ئاگرتێبەردا.
بەپێی ڕاپۆرتی هەواڵدەریی ئەلعەرەبییە ڕۆژی یەکشەممە١٩ی بانەمەڕی ١٤٠٠ی هەتاوی، لەپاش کوژرانی”ئەیهاب ئەلوەزنی” چالاکی عێراقی بە دەستی میلیشیاکانی سەر بە ڕێژیمی ئێران لە کەربەلا، خەڵکی ناڕازیی بە دروشمی دژبە ڕێژیمی ئێران، کۆماری ئیسلامییان بە کوشتنی چالاکانی عێراقی تۆمەتبار کرد و کونسوولخانەی ئێرانیان لە کەربەلا ئاگرتێبەردا.
هەرلەم پێوەندییەدا باڵوێزخانەی ئەمریکا لە عێراق، بە دەرکردنی بەیاننامەیەک ڕایگەیاند کە کپ‌کردنی دەنگەناڕازییەکان لە ڕێگای کوشتنەوە ئیزن پێدراو نییە.
لەلایەکی دیکەوە ستیڤێن هیکی، باڵوێزی بریتانیا لە عێراق لە وتووێژێکدا لەگەڵ هەواڵدەریی ئەلعەرەبییە، سەرەڕای مەحکوومکردنی تێرۆری ئەیهاب ئەلوەزنی وتی: گرووپەکانی نزیک لە ئێران چالاکانی مەدەنیی عێراقیی تێرۆر دەکەن و هێزە عێراقییەکان دەبێ پشتیوانی لە چالاکانی مەدەنیی بکەن.
مستەفا کازمی، سەرۆک وەزیرانی عێراق لەم پێوەندییەدا وتی: دەبێ بە زووترین کات بکوژانی ئەیهاب ئەلوەزنی دەسبەسەر بکرێن و بە توندترین شێوە سزا بدرێن.
ئەیهاب ئەلوەزنی، چالاکی دیاری عێراقی و بەرپرس و ڕێکخەری ناڕەزایەتییەکان لە کەربەلا، ڕۆژی یەکشەممە لە هێرشێکی چەکدارانەدا کوژرا و بەم هۆیەوە خەڵکی ناڕازیی بە کاردانەوە لەهەمبەر تێرۆرکردنی ئەیهاب، سەرەڕای بە تاوانبار ناساندنی سپای قودسی ڕێژیمی ئێران، کونسوولخانەی ئێرانی لە کەربەلا بە نیشانەی ناڕەزایەتیی دەربڕین لە دەستێوەردانەکانی ڕێژیمی ئێران و تێرۆرکردنی چالاکانی عێراقیی ئاگر تێبەردا.