وەدەنگهاتنی ٣٧ ڕێکخراوی مافی مرۆڤ سەبارەت بە ڕەشبگیریی خەڵکی ڕۆژهەڵاتی کوردستان

٣٧ ڕێکخراوی مافی مرۆڤ، داوا لە کۆمەڵگەی جیهانیی دەکا کە بە زووترین کات ئاوڕ لە ڕەشبگیریی خەڵکی ڕۆژهەڵاتی کوردستان بداتەوە کە لەلایەن کۆماری ئیسلامییەوە دەسبەسەر دەکرێن.
٣٧ ڕێکخراوی مافی مروڤ و ناوەندی مافی مرۆڤ، نامەیەکی کراوەیان بڵاو کردۆتەوە و تێیدا باس لە ڕەشبگیریی خەڵکی ڕۆژهەڵات لە ماوەی یەک مانگ و نیوی ڕابردوودا دەکا.
ئەو نامەیە لە لایەن چەندین ڕێکخراوی مافی مرۆڤەوە واژۆ کراوە و پاڵپشتیی خۆیانیان دەربڕیوە، لەوانە ڕێکخراوی چاوەدێری مافی مرۆڤ، کەمپەینی مافی مرۆڤی ئێران، لێبوردنی نێونەتەوەیی و تۆڕی مافی مرۆڤی کوردستان.
لەو نامەیەدا هاتووەکە، تا ئێستا هیچ بەرپرسێکی کۆماری ئیسلامی سەبارەت بەو ڕەشبگیرییە هیچ لێدوانێکیان نەداوە و ئەگەری زۆرە دەسبەسەرکراوان ناچار بە دانپێنانی زۆرەملێ بکرێن و نیگەرانی خۆیان سەبارەت بەم بابەتەش دەربڕیوە و زۆربەی زۆری ئەو دەسبەسەرکردنانە بە بێ بەڵگەی یاسایی ڕوویانداوە.
جێی ئاماژەیە کە، نامەی کراوەی ئەم ٣٧ رێکخراوە باس لەوە دەکەن ٤٠ کەس لە دەسبەسەرکراوان بێسەروشوێن بوون و پاش بە دواداچوونی بنەماڵەکان هیچ ناوەندێکی دەوڵەتیی یا بەرپرسێکی کۆماری ئیسلامی وەڵامدەر نییە.