كۆنفرانسی نێودەوڵەتیی كوردەكان لە ژێر ناوی “یەكیەتیی ئورووپا، توركیە، خۆرهەڵاتی نێوەڕاست و كوردەكان” لە پارلمانی ئورووپا بە قسەكانی “كاریانە وێسترهایم” سەرۆكی EUTTC و “گابی زیمر” سەرۆكی فراكسیۆنی چەپگەراكانی پارلمانی ئورووپا، دەستی پێ كرد.
شیرین عیبادی، براوەی خەڵاتی ئاشتیی نۆبێل لهو کۆبوونهوهیهدا، ڕایگەیاند لە هەموو وڵاتێك جۆراوجۆری فەرهەنگ دەبێتە هۆی پێشكەوتنی فەرهەنگی ئهو وڵاته، بهڵام له ئێران ههوڵی سڕینهوهیان دهدرێ. عیبادی هەروەها گوتوویەتی وڵاتێك كە خاوەنی گرووپە جۆراوجۆرە نهتهوهیی، ئایینی و زمانییەكان بێ، لە بواری فەرهەنگەوە وڵاتێكی دەوڵەمەندە.
عیبادی هەروەها وەبیری هێنایەوە، ئەركی هەموو دەوڵەتێكە بەرگری لە پێکهاته نهوهییهکانی وڵاتهکهی بكاو پشتیان بگرێ. ئەگەر وڵاتێك ئەم ئەركانەی خۆی بەجێ نەگەیەنێ، وڵاتێكی دێمۆكراتیك نییەونابێ ئەم مەسەلە بە قورس نیشان دانی قانوونەكان لە بەرژەوەندیی زۆرینەدا، پێناسەی بۆ بكرێ. شیرین عیبادی پێداگریی لهسهر ئهوه کرد که نابێ ئەو لایەنەی دەسەڵاتی بە دەستە، مافی كەسانی دیكە پێشێل بكاو دەبێ هەموو شتێك لە چوارچێوەكانی دێمۆكراسیدا تاوتوێ بكرێ.
براوەی خەڵاتی ئاشتیی نۆبێل هەروەها گوتی ئەم وڵاتەی كە مافەكانی نەتەوەكان پێشێل دەكا، وڵاتێكی دێمۆكراتیك نییە.
عیبادی هەروەها گوتی لە ئێستادا که خەریكی لێكدانەوەی بارودۆخی نەتەوەی كوردن، بەڵام پێویسته بگوترێ که بارودۆخی نەتەوەی كورد لە باكووری كوردستان زۆر نالەبارەو پێداگریشی كردەوە كە دەوڵەتی توركیە دەبێ ڕێز لە مافە فەرهەنگییەكانی نەتەوەی كورد بگرێ.
عیبادی لە درێژەی قسەكانیدا گوتی كوردەكان نەك هەر لە توركیە بەڵكوو لەو وڵاتانهی دیکهش که کوردیان لێیه مافەكانیان لێ زەوت كراوەو؛ پاشان ئاماژەی بە هەڵاواردنی كوردەكان لە ئێران كرد.
ناوبراو گوتی دەوڵەتی ئێران بەرپرسیاری ههموو سیاسەتە پڕ لە هەڵاواردنەكان بەدژی نەتەوەی كورده لهو وڵاتهدا.
شیرین عیبادی له کۆتاییدا گوتی: كاتێك خەڵاتی ئاشتیی نۆبێل بە من بەخشرا، بەم پێیە كە هەموو كەس ئەم مافەی هەیە گرووپێكی مووسیقی بۆ ڕێوڕەسمی خۆی هەڵبژێرێ، من بژاردهی زۆرم هەبوو، بەڵام گرووپی مووسیقیی كوردیو کامکارهکانم هەڵبژارد.
