باڵوێزی ئەمریکا لە عێراق بە ئاماژە بە پشتیوانیی ڕێژیمی ئێران لە گرووپە میلیشیاکانی عێراق وتی: میلیشیا تێرۆریستەکانی عێراق بە بڕیاری سپای پاسداران و بە چەکوچۆڵی ئێرانەوە، هێرش دەکەنە سەر بەرژەوەندییەکانی ئەمریکا لە عێراق.
ماتیۆ تولێر، باڵوێزی ئەمریکا لە بەغدا، ڕۆژی سێشەممە ٧ی بانەمەڕی ٩٩ی هەتاوی لە وتوێژێکدا لەگەڵ کاناڵی هەواڵدەریی ئەلعەرەبییە وتی: ئەو چەکوچۆڵ و مووشەکانەی کە بۆ سەر بەڕژەوەندییەکانی ئەمریکا لە عێراقدا کەڵکی لێوەردەگیردرێ هەمووی لەلایەن ڕێژیمی ئێرانەوە بەرهەمدێ و دەدرێ بە میلیشیا تێرۆریستەکانی عێراق.
باڵوێزی ئەمریکا لە عێراق جەختی لەسەر ئەوە کردەوە کە بڕیاری هێرش بۆ سەر ناوەندە دیپلۆماتەکان و بنکە سەربازییەکانی ئەمریکا لە عێراقدا لە لایەن سپای پاسدارانەوە دەردەچێ و ئەم دەستێوەردانەی ڕێژیمی ئێران و هێرشی میلیشیاکانی سەربەو ڕێژیمە سەروەری عێراق دەباتە ژێر پرسیار و خەوشداری دەکا.
ماتیۆ تولێرلە درێژەی وتووێژەکەیدا سەرەڕای مەحکوومکردنی هێرشی میلیشیاکانی سەر بە ڕێژیمی ئێران بۆ سەر فڕۆکەخانەی نێودەوڵەتیی هەولێر وتی: ئێمە ڕووبەڕووی هەموو هەوڵە تێکدەرانەکانی ڕێژیمی ئێران دەبینەوە.
