جەریمەكردنی كۆڵبەرێكی كورد لە سەردەشت پاش برینداربوونی به‌ تەقەی هێزەکانی ڕێژیم

كۆڵبەرێكی كورد لە ناوچەی سەردەشت که‌ بەهۆی تەقەی ڕاستەوخۆی هێزە چه‌کداره‌کانی ڕێژیم بریندار ببوو، سه‌رباری برینداربوونی سزای نه‌غدیی به‌سه‌ردا سه‌پا.
پاش ئەوەی كە مەئموورانی هەنگی مه‌رزی لە شاری سەردەشت بە تەقەی ڕاستەوخۆ كاسبكارێكی كوردی خەڵكی پیرانشار بریندار دەكەن، بە بنەماڵەكەی ڕادەگەیەنن که‌ بە هۆی بەزاندنی سنوور دەبێ جەریمەش بدا.
بەپێی ڕاپۆرتی ماف نیوز، ڕۆژی پێنجشەممە ١ی ڕێبەندان، هێزەكانی هەنگی سنووریی سپای پاسداران لە سەردەشت ڕاستەوخۆ تەقە لە كاسبكارێكی كورد بە ناوی لوقمان په‌شنگی دەكەن‌و برینداری ده‌که‌ن.
هێزەكانی هەنگی سنووری سپا، پاش برینداركردنی ئەم كۆڵبەرە، بە بنەماڵەی ناوبراویان ڕاگەیاندوە كە جەریمەیەك وەك بەزاندنی ناقانوونیی سنوور بدا.
ئەم كۆڵبەرە تەمەن٣٤ ساڵە خاوەن ژن‌و دوو منداڵی هەیەو گولله‌ به‌ر دەست‌و شانی که‌وتوه‌و ئێستا لە نەخۆشخانەی ئیمام ڕەزای ورمێ نەشتەرگەری بۆ کراوه‌و له‌ ژێر چاوه‌دێریی پزیشکی دایه‌