پسپۆرانی سەربازیی پێشبینی دەكەن ئەمریكا ئۆپەراسیۆنێكی سەربازیی بەربڵاو لەسەر خاكی عێراق بە دژی میلیشیا شیعەكانی سەر بە ئێران، لە وەڵامی بەردەوامیی ئەو هێرشانەی دەكرێنە سەر ناوەندە دیپلۆماسی وسەربازییەکانی ئەمریکا بەڕێوەببا.
ئاژانسی هەواڵی “سپۆتنیک”ی ڕووسی، ڕۆژی یەكشەممە ٢٩ی خاکەلێوەی ١٤٠٠ی هەتاوی، لە راپۆرتێكدا ئاماژەی بە ڕای ژمارەیەك پسپۆری بواری سەربازیی و ئەمنی داوە لەبارەی هەنگاوی داهاتووی ئەمریکا لە عێراق، پێیانوایە ئەمریكا بە تەنیا یان لەگەڵ هاوپەیمانەکانیدا ئۆپەراسیۆنێكی سەربازیی بەربڵاو بەدژی میلیشیاکانی سەربەڕێژیمی ئێران بەڕێوە ببا.
ئاژانسی هەواڵی(سپۆتنیك) بە ئاماژە بە پەیامەكەی رۆژی چوارشەممەی ئەمریكا كە داوای لە حكوومەتی عێراق كردبوو ناوەندە دیپلۆماسییەکانی بپارێزت، دەنا ناچار دەبن خۆیان بەرگری لە خۆیان بكەن.
هەروەها ڕوبێرت وۆلێر، سەركۆنسوڵی گشتیی ئەمریكا لە هەولێر ڕایگەیاندبوو ئەگەر حكوومەتی عێراق نەیانپارێزێت، ناچارن خۆیان خۆیان بپارێزن.
بەپێی ئەم ڕاپۆرتە، ئەم پێشبینییە سەربازییە چاوەڕوانكراوە دوای چەندین مانگ لە دەستپێكردنی هەڕەشە و هێرشی بەردەوامی گرووپە میلیشیا تێرۆریستە شیعەكانی سەر بە ئێران بە دژی هێزەكانی ئەمریكا و هاوپەیمانان لە عێراق، بەتایبەتی بەردەوامبوونی هێرشە مووشەكییەكان بۆ سەر ناوەندە دیپلۆماسی وسەربازییەکانی ئەمریکا لە عێراق کراوە.
