پەرەسەندنی کۆبوونەوە ناڕەزایەتییەکان لە ئێران

لە درێژەی کۆبوونەوە ناڕەزایەتییەکان لە ئێران، ڕۆژی ڕابردوو ٢٨ کۆبوونەوەی ناڕەزایەتی لە شارەکانی ئێران بەڕێوەچوو.
بەپێی ڕاپۆرتی هەواڵدەریی هرانا، ڕۆژی یەکشەممە ٢٢ی خاکەلێوەی ١٤٠٠ی هەتاوی، لە درێژەی کۆبوونەوە نارەزایەتییەکان لە ئێراندا، کۆبوونەوەی ناڕەزایەتیی کۆمەڵێک لە خانەنشینکراوانی ڕێکخراوی دابینکردنی کۆمەڵایەتیی لە ٢٤ شاری ئێران ، لەبەردەم بینای مەجلیس و شارەکانی شاهروود، خوڕەماوا، ڕەشت، کەرەج، کرمان، ئەردەبێڵ، ئەندیمشک، سنە، نەوشەهر، نەیشابوور، کرماشان، بجنوورد، قەزوین، ساری، ئەهواز، ئیسفەهان، ئیلام، یەزد، تەورێز، ئەراک، شووش و شووشتەر لە بەردەم بینای ڕێکخراوی دابینکردنی کۆمەڵایەتیی شارەکانیان و هێزەکانی ئاگرکوژێنەوەی شاری کورد لەبەردەم پارێزگاریی چوارمەحاڵ و بەختیاری، کارمەندانی ئیدارەی کشت و کاڵی خووزستان لەبەردەم بینای ئۆستانداری خووزستان، پشکدارانی بازاری بوورس لەبەردەم بینای بوورس لە تاران و کرێکارانی کۆمپانیای پارس متاڵ لە بەردەم کۆمپانیاکە بەڕێوەچوو.
لەم کۆبوونەوە ناڕەزایەتییانەدا خانەنشینکراوانی ڕێکخراوی دابینکردنی کۆمەڵایەتیی، بە ڕاخستنی سفرەی بەتاڵ و بەدروشمی دوژمنی ئێمە ئەمریکا نییە بەرپرسانی ئێرانە، ناڕەزایەتیی بەربڵاویان دەربڕی و ڕایانگەیاند کە تا ئەو کاتەی داواکارییەکانیان جێبەجێ نەکرێ، کۆبوونەوە ناڕەزایەتییەکانیان بەردەوام دەبێ.