هەواڵدەریی فەرانسە لە ڕاپۆرتێکدا نووسی: گرووپە میلیشیاکانی عێراق، کە لەلایەن سپای پاسدارانی ڕێژیمی ئێرانەوە پشتیوانیان لێدەکرێ بە زۆری دەست بەسەر بەشێکی بەرچاو لە داهاتی گومرک و هاوردەی ئەو وڵاتەدا دەگرن.
هەواڵدەریی فەرانسە ڕۆژی ٩ی خاکەلێوە، لە زمان دەزگا زانیارییەکانی عێراقەوە نووسی: گرووپە میلیشیاکانی عێراق کە لەلایەن سپای پاسدارانەوە پشتیوانییان لێدەکرێ، کۆنتڕۆڵی تێرمیناڵ و خاڵە گومرکییەکان و بەندەری “ئومولقەسر” لە عێراقیان بە دەستەوەیە و داهاتی ئەو چەند شوێنە بە زۆر لە کۆمپانیاکان و ئەو بازرگانانە کە کەلوپەل هەناردەی عێراق دەکەن وەردەگرن.
هەواڵدەریی فەرانسە ئەوەشی زیاد کرد کە کۆنتڕۆڵی گومرکی “مەندەلی” لە سنووری نێوان ئێران و عێراق بە دەستی هێزی چەکداری سپای “بەدرەوەیە” کە لەلایەن سپای پاسدارانەوە دامەزراوە.
لە درێژەی ئەو ڕاپۆرتەدا هاتووە کە گروپە میلیشیاکانی دیکە وەک حیزبوڵا و عەسائیبی ئەهلی هەق، گومرک و ترمیناڵەکانی دیکەیان خستۆتە ژێر کۆنتڕۆڵی خۆیان و داهاتەکەی لە نێوان خۆیاندا دابەش دەکەن و تەواوی داهاتی هاوردەی سیگار لە ئیختیاری حیزبوڵای عێراق‌دایە.
شایانی باسە کە میلیشیاکانی عێراقی کە سەر بە ڕێژیمی ئێرانن ساڵانە لانیکەم ٦ میلیارد دولار لەو گومرکانە لە هاوردەکاران وەردەگرن و ئەوە دەبێتە هۆی بەهێزبوونی ئەوان و لاوازیی دەوڵەتی عێراق و بەرپرسێکی ئاسایشی عێراق لەو بارەوە بە هەواڵدەریی فەرانسەی وت: کە داهاتی ئەو گرووپانە تەنیا لە بەندەری “ئومولقەسر” بەرابەر لەگەڵ بودجەی یەک ساڵی یەک دەوڵەتە.
