مخابن سەرلەبەیانیی ئەمڕۆ كاك سەلاح مێھرپەروەر، كوڕی بەڕێز كاك عەلی مێھرپەروە، پاش بەربەرەكانێی سەخت لەگەڵ پەتای كۆڤید ١٩، لە شاری ھەولێر كۆچی دوایی كرد.
كاك سەلاح لەدایكبووی ١٩٦٥ لە شاری مەریوانی رۆژھەڵاتی كوردستان بوو. رابردووی كەسایەتیی كاك سەلاح و بنەماڵەكەی لای خەڵكی كوردستان روون و ئاشكرایە. پاش رووخانی رێژیمی پاشایەتی و ھاتنە سەركاری دەسەڵاتی نوێی رێژیمی ئێران و دیسانەوە دژایەتیی ناوەند لەگەڵ مافەكانی نەتەوەی كورد، بەشی بەرچاوی كۆمەڵگەی كوردستان رێگای نیشتمانپەروەرییان ھەڵبژارد. بنەماڵە مێھرپەروەریش بە ھەموو ئیمكانات و ھەموو ئەندامانی بنەماڵەوە كەوتنە بەرگری لە نەتەوە و نیشتمانیان و تێكەڵی بزووتنەوەی رزگاریخوازیی كوردستان بوون و وەك ئەندامی حیزبی دێموكرات خەبات دژی داگیركارییان ھەڵبژارد. بەڕێز عەلی مێھرپەروەر و ھەموو بنەماڵەشی خەبات بۆ رزگارییان لە شاری مەریوان ھەڵبژارد و لە ھەموو رووداوەكانی ناوچەی مەریوان و ھەوراماندا رۆڵی بەرچاو و گرنگی لە ئەستۆ بوو و بە ھەموو تواناوە ھەوڵی دەدا كاریگەریی ئەرێنیی لە بزووتنەوەی رزگاریخوازیدا بگێڕێ. ناوبراو ھەر زۆر زوو كەوتە بەرچاوی رێژیمی داگیركەر و خائینانی نیشتمان.
پاش ئەوەی ھێزی پێشمەرگە شارەكانی چۆڵ كرد و شاخیان ھەڵبژارد، بنەماڵەی كاك عەلی و ھەموو شۆڕشگێڕانی دیكە كەوتنە بەر رق و قینی رێژیم و كەوتنە بەر ئازار و ئەشکەنجە.
كاك سەلاح كە كوڕی گەورەی ماڵ بوو و سەرپەرەستی بنەماڵەیشی لە ئەستۆ بوو، زیاتر كەوتە بەرچاو و ڕقی دوژمنان. ھەر بۆیە بە ناچاری ھاوڕێ لەگەڵ خۆشكی خۆی شاریان بەجێھێشت و رێگای پڕ لە شانازیی پێشمەرگایەتییان ھەڵبژارد و ساڵی ١٩٨٨ بوونە پێشمەرگەی حیزبی دێموكرات. ناوبراو لەسەردەمی پێشمەرگایەتیدا زۆر لێوەشاوانە وەک مامۆستای شۆڕش و هەروەها لە بەشی راگەیاندن ئەركی بەڕێوە دەبرد و خزمەتی بە نەتەوە و نیشتمانی دەكرد. كاك سەلاح بە واتای راستەقینە كەسایەتییەكی خۆش بیر و تێگەیشتوو و ڕووخۆش لەگەڵ مرۆڤە نیشتمانپەروەرەكاندا بوو. كەسایەتیی بەرز و دڵسۆز و رووخۆشی كاك سەلاح ببووە ھۆی پەرەسەندنی ئاستی خۆشەویستیی ئەو لەنێو ھەموو ئەوانەی دوور و نزیك لەگەڵی پێوەندییان بوو و دەیانناسی. كاك سەلاح پاش نیشتەجێ بوون لە باشووری كوردستان، لە ھەولێریش ھاوكاری بەشێكی بەرچاو لە راگەیاندنەكان بوو و رۆڵی بەرچاوی ھەبوو لە پێشخستنی پیشەی راگەیاندن و كەسێكی خۆشناو و خۆشەویستی كۆڕی راگەیاندنكارانی باشووری بوو.
کاکە سەلاح پاش ساڵانێكی زۆر لە ھاتنەدەری ناچاری لە رۆژھەڵات، قەت كۆڵی نەدا و بە شێوازی جۆراوجۆر لە خەبات بۆ رزگاریی نەتەوەكەی لە رۆژھەڵات بەشدار بوو و دڵسۆزانە درێژەدەری رێگای باوكی پێشمەرگە و شەھیدانی كوردستان بوو.
لە ژیانی تایبەتیش‌دا هاوڕێ و باوك و ھاوسەرێکی بە واتای راستەقینە بوو. لە ژیانی ھاوبەش‌دا بەختەوەریی تا ترۆپك گەیاندبوو، لە پەروەردەی منداڵدا، مامۆستایەكی راستەقینە بوو. دوو رۆڵەی دڵسۆزی نیشتمان و ئازا و بەتوانای پەروەردە كرد. كاك سەلاح ئاواتی زۆری لەدڵ‌دا بوو بۆ نەتەوە و نیشتمانەكەی. مخابن میوانی ناوادەی مرۆڤایەتی كە ھەموو دونیای تەنیوە، دەرفەتی لێ وەرگرتەوە و نەیتوانی بۆ گەیشتن بە ئامانج و ئاواتەكانی زیاتر خزمەتی نەتەوە و نیشتمانی بكات.
یادی ئازیزی ھەتایی دەمێنێ.
بە بۆنەی کۆچی دوایی کاک سەلاح مێهرپەرەوە پڕ بە دڵ سەرەخۆشی لە باوکی تێکۆشەری، ڕێزدار کاک عەلی مێهرپەروەر و سەرجەم بنەماڵەکانی مێهرپەروەر و کۆنەپۆشی و تەواوی هاوڕێ و هاوسەنگەرانی دەکەین.
کۆچی دوایی پێشمەرگەیەکی ڕاگەیاندکار
نوێترین
