لە گوندەکانی “کۆرە و یارە”ی سەربە ناوچەی جوانڕۆ، بەبۆنەی ١٠ی خاکەلێوە ساڵڕۆژی لەسێدارەدانی پێشەوا قازی محەممەد و هاوڕێیانی چالاکیی تەبلیغی بەڕێوە چوو.
بەپێی هەواڵی گەیشتوو لە کۆمیسیۆنی تەشکیلاتی حیزبی دێموکراتی کوردستانەوە، ڕۆژی شەممە ٧ی خاکەلێوەی ١٤٠٠ی هەتاوی، ئەندامان و لایەنگرانی حیزبی دێموکراتی کوردستان بەبۆنەی ساڵڕۆژی لە سێدارەدانی “پێشەوا قازی محەممەد” سەرۆککۆماری کوردستان و ڕۆژی شەهیدانی کوردستان، لە گوندەکانی کۆرە و یارە چالاکیی تەبلیغییان بەڕێوە برد و پەیمانی وەفادارییان لە گەڵ ڕێبازی شەهیدانی کوردستان نوێ کردەوە.
ئەویندارانی ڕێبازی پێشەوا قازی محەممەد و هەڵگرانی ئاڵای شەهیدانی کوردستان لە ڕۆژهەڵات سەرەڕای ئەوەی کە هێزە سەرکوتکەرەکانی کۆماری ئیسلامی بەهەموو شێوەیەک ڕێگری لە چالاکیی نەتەوەیی و بەرزڕاگرتنی بەها پیرۆزەکانی کوردستان دەکەن، بەڵام کچان و کوڕانی نیشتمانپەرەوە بە بێ گوێدان بە هەڕەشە و ڕێگرییەکانی چەکدارەکانی کۆماری ئیسلامیی ئیران، هەموو ڕێوڕەسمە پیرۆزە نەتەوەییەکانی خۆیان یاد دەکەنەوە و لە ڕۆژی ١٠ی خاکەلێوەدا بە بەڕیوەبردنی چالاکیی بەربڵاوی تەبلیغی بە دوژمن دەلێن کە ئەو ڕۆژە لە بیر ناکەن و پەیمانی وەفاداری لەگەڵ شەهیدانی کوردستان نوێ دەکەنەوە.
