خەڵکی کوردستان سەرەڕای بەربەست و گوشاری هێزەکانی ڕێژیم بەو پەڕی شکۆوە بەرەوپیری ساڵی نوێ و جێژنی نەورۆزەوە چوون.
خەڵکی ڕۆژهەڵاتی کوردستان سەرەڕای گوشارەکانی ناوەندە ئەمنییەتییەکانی سەر بە ڕێژیم و کەشی میلیتاریستی زاڵ بەسەر کوردستان، ڕێوڕەسم و ئاهەنگی نەورۆزی کوردەوارییان بەڕێوە برد و یادی ئەم جێژنە نەتەوەییەیان بەرز ڕاگرت و پیرۆزبایی ئەو جێژنەیان لە یەکتری کرد.
ڕۆژی پێش نەورۆز هێزە چەکدارەکانی ڕێژیم زۆربەی ڕێگای ئەو گوند و شوێنانەیان کە ساڵانی پێشوو ڕێوڕەسمی نەورۆزی بەشکۆوە تێیدا بەڕێوە دەچوو داخست و هەڕەشەیان لە خەڵک کرد کە نابێ ڕێورەسم و ئاهەنگی نەورۆزی بگێڕن.
بەڵام خەڵکی چاونەترسی کوردستان گوێیان بە پیلان و هەڕەشەکانی ڕێژیم نەدا و بەوپەڕی شکۆوە ڕێوڕەسم و ئاهەنگی نەورۆزییان لە شارەکانی پیرانشار، مەریوان، سەقز، مەڵکشای ئیلام، کرماشان، سەرپێڵی زەهاو، سەردەشت، دێولان، کامیاران، سنە، ورمێ، سەوڵاوا، مەهاباد، بۆکان، هەورامان و بانە، هەوشار ، داڵاهۆ، بەرز ڕاگێڕا و سەمای جامانەکان وەک ساڵانی پێشوو بەڕێوەچوو.
خەڵکی ئازادیخواز و نیشتمانپەروەر ئاڵای پیرۆزی کوردستانیان لە شاخەکانی تەرەغەی بۆکان، چیای ڕووش و گوندی قلاکۆنی سەقز، میراویی شنۆ، نێ، تەنگیسەر و گاوارە ئاڵای کوردستانیان هەڵکرد و سروودی ئەی ڕەقیبیان وتەوە و لە شارەدێی نییەر لەلایەن هۆگرانی دێموکراتەوە وێنەی شەهیدانی سەرکردە قازی قاسملوو و شەرەفکەندی بە دەستی ئەویندارانی نیشتمان بەرز کرایەوە.
