سەرەڕای کەشیکی یەکسەر میلیتاریستیی لە کوردستان ڕێوڕەسمی نەورۆز لە زۆربەی شوێنە هەستیارەکان بەڕیوەچوو.
ڕۆژی هەینی ٢٩ی ڕەشەمەی ٩٩ی هەتاوی، کۆماری ئیسلامی زیاتر لە ١٠٠٠ کەس لە هێزە چەکدارەکانی سپای پاسداران چوار دەوری چیای تەرەغەیان لە شاری بۆکان گەمارۆ دا و ئیزنیان نەدا کە خەڵک ڕێوڕەسمی نەورۆز لەسەر چیای تەرەغە بەڕێوە بەرن، بەڵام خەڵکی نیشتمانپەروەری کوردستان بێ ئەوەی گوێ بەو ئاستەنگانەی رێژیم بدەن، لە بناری کێوی تەرەغە دیدار و نەورۆزیان لە گەلی کورد پیرۆز کرد.
بۆ ڕێگرتن لە دیداری تەرەغە سپای پاسداران لە چەکوچۆڵی قورسی وەکوو دۆشکا و بیکەیسی کەڵکیان وەرگرتووە و لە میاندواو و شارەکانی دەوروبەری بۆکان هێزییان هێنابوو و ڕێگرییەکی توندیان لە هاتوچۆی خەڵک بۆ تەرەغە دەکرد بۆ ئەوەی ڕێوڕەسمی نەورۆز بەڕێوە نەچێ بەڵام خەلکی کوردستان وەکوو نەریتێکی کۆنی کوردەواری کۆڵیان بە ڕێگریی هێزە سەرکوتکەرەکانی ڕێژیم نەداوە و بە ئەوینی نیشتمانەوە لە بناری تەرەغە جێژنی نەورۆزیان بەڕێوە برد.
هەر لەو پێوەندییەدا ڕۆژی هەینی ٢٩ی ڕەشەمەی ٩٩ی هەتاوی، سەرەڕای توند بوونی دۆخی ئەمنییەتیی لەلایەن هێزە سەرکوتکەرەکانی کۆماری ئیسلامییەوە، خەڵکی نیشتمانپەروەری ناوچەی سەقز سەرەڕای هەموو ئاستەنگەکانی کۆماری ئیسلامی، ڕێوڕەسمی بەشکۆی نەورۆزیان لەسەر چیای “ڕووش” بە هەڵکرادنی ئاڵای پیرۆزی کوردستان بەڕێوەبرد.
شایانی باسە کە لە هەموو ناوچەکانی کوردستان، لەوانە سنە، مەریوان سەردەشت،پیرانشار ، شنۆ، کرماشان و ئیلام، خەڵکی کورد بە جلوبەرگی خاکی و جامانەوە بە بێ گوێدان بە هەڕەشەکانی کۆماری ئیسلامیی بە شێوازی جۆراوجۆر ڕێوڕەسمی نەورۆزیان بەڕێوە برد و دەیبەن.