لەو دیوی میلەکانی بەندیخانەشەوە ھەست بە گەرمیی گڕی ئاگری نەورۆزی کوردەواری دەکەم
ئەمساڵیش لە بەرەبەرەی نەورۆزدا خەریکە سروشتی بەھاری جارێکیتر بەرگێکی جوان بکاتەوە بە بەر نیشتماندا و بووکی ڕازاوەی سروشت ھەر ساڵە و بە بەرگێکی ئاڵوواڵاوە خۆی بنوێنێ، ئەمساڵیش ھێندەی نەماوە ئاگری نەورۆزی کوردەواری لەسەر چیا و کەژ و کێوی نیشتماندا بکرێتەوە و “وا ئەمڕۆژی ساڵی تازەیە نەورۆزە ھاتەوە” ببێتەوە وێردی سەر زمانی کیژان و کوڕانی لاوی زێدی کوردان و گەل بەگشتی لەم ڕۆژەدا بەرەوپیری نەورۆزەوە بچن. جارێکیتر بەفری سەر لوتکەی شاخان ھێدی ھێدی بارگەوبنەی تێکەوە دەپێچێ و دەتوێتەوە، خڕ و ڕەندۆڵی دەڤەرە ڕەنگینەکەی کوردان جارێکیتر بە ئاوی سازگاری بەفراو دەزێنەوە. گوڵە نێرگزی پێدەشت و وەنەوشەی ژێر سپیدار و دەم کانیاوەکان دەژێنەوە، قەد پاڵ پڕ دەبن لە لاوانی بەھەستی نیشتمان و گەڕی گۆڤەند و شایی و ڕەشبەڵەک جارێکیتر جوانترین ھاڕمۆنی بەم ناوە دەبەخشنەوە.
ھەر چەپکە نێرگزە و بەدیاری دەدرێ بە یەکتر و قاقا و پێکەنینەکان لەدایک دەبنەوە، دڵەکان شاد دەبن و دڵتەنگی زستانێ جارێکیتر دەگۆڕێ بە دڵخۆشی و ڕوخسارەکان لە بەرەبەری نەوڕۆزدا لە جاران جوانتر و گەشتر دەبن، ڕووناکی زاڵ دەبێ بەسەر تارێکیدا و خەمی پەنگخواردووی لاوان جارێکیتر دەتەقێتەوە و نیشتمان دەبێتەوە بە پارچەیەک لە خۆشویستنی نیشتمان و گڕی گەرمی ئازادی کلوو بەفرەکانی بێدادی دەتوێنێتەوە.
نەورۆز و نوێبوونەوەی ڕۆژێکی نوێ تیشکەکانی لە کەلدا دەردەکەون و خۆری ھیوا سەر دەردێنێتەوە، لە نەورۆزاندا ھەرچی جلوبەرگی جوان و ئاڵ و واڵای کوردییە دەکرێتە بەر و داوێنی بنار و نساری ئەم نیشتمانە دەخەمڵێ و ھەر شادی و خۆشی و خۆشەویستییە دەبەشرێتەوە.
زۆر لەمێژە و چەندین دەیەش دەبێ شۆڕشگێڕانی گەلی کورد و ئەوانەی پێش مەرگ دەکەون و پێشمەرگەن مەشخەڵ بەدەستن و لە ھەموو شەوێکی تاریک و ئەنگوستەچاودا دڕ بە تاریکی دەدەن، گڕی ھیوای ڕووناکی بەم نیشتمانە دەبەخشن کە دەمێک ساڵە نەیارانی داگیرکەری خوێنی ئەم گەلەیان دە شووشە کردووە و ھێشتا تێر نابن لە خوێن مژین، شۆڕشگێڕان ئاڵاھەڵگرانی بیری ئازادی و ڕزگارین کە کاوە ئاسا سینگیان قەڵغانە بۆ پاراستنی نیشتمان، ئەم چیا و کۆسارانە دەمێک ساڵ و حەیامە بوونەتە وارگەی قاسپەی چەکی دەستی پێشمەرگە و داستانی بەرگرییان تێدا لەدایک دەبێ و دەنووسرێنەوە، نە ئەم چیا و کەژانە بێهیوا دەبن، نە پێشمەرگەش تا ھەڵهاتنی خۆری ھیوا لەسەر ئەم لوتکانە مەخشەڵی دەستیان بێ گڕی سووری ھیوا دەبێ.
زۆرن ئەو ڕۆڵە قاڕەمانانەی وەکو کەماڵ شەریفی لە نێو میلە سارد و سڕەکانی بەندیخانەش دا ھێشتا لە تینی گەرمی ئاگری نەورۆزانەی کوردەواری بێ ھیوا نابن، ڕاستە ئەوان ئێستا چەندین ساڵە دەست و قاچیان ئاشنای تەزوە ساردەکانی زنجیری بەندیخانەیە، بەڵام ھێشتا بێ ھیوا نەبوون و دڵیان مەکۆی ئاگری خەباتی ئەم چیا و کەژانەیە. دەمێک ساڵە ئەوان لە سلول و ژووری تاریکدا بەند دەکرێن، بەڵام تروسکایی ھیوای ژیان و ڕووناکی ھەر دێت و لە ناخ و دەروونیاندا بڵێسە و گڕ دەگرێ. ئەوان لە بەندیخانەدا ئاشنا و دەستلەملانی ھەموو جۆرە ئەشکەنجە و ڕوح کێشانێکن، بەڵام بۆ تەنیا جارێکیش لەم بیر و ھزرەی کە عەوداڵی بوون لا نادەن و پۆلوی گڕی شۆڕشگێڕییان لەگەڵ ھەموو شنە بایەکی ئازادیدا دەگەشێتەوە. دوور دەخرێنەوە، چەندین ساڵ لە مەرەخەسی بێبەش دەکرین، ڕۆماتیزم و شین ھەڵگەرانی جەستە و شوێنی باتوون و قامچی و کوژاندنەوە سیگار لەسەر جەستەیان ھەرگیز ناتوانێ بیانترسێنێ، مەرگی قارەمانانە، کەم ژیان و کەڵ ژیان ھەڵدبژێرن، جۆرەھا نەخۆشی لە نێو بەندیخانەدا تەنگیان پێھەڵدەچنێ، بەڵام ئەوان بیرو ھزریان بە شۆڕشگێڕی مشتوماڵ دراوە و نازانن ئازاری جەستەی نێو بەندیخانە چییە.
بەرزە لوتکەکانی ئەم نیشتمانە خۆڕسکانە وارگەی ئەو شۆڕشگێڕانەیە کە سڵ لە مەرگ ناکەنەوە، بەندیخانە نایانترسێنی و ھەر بە ئەشقەوە بە بەرەو پیری مەرگەوە دەچن و مەشخەڵی ڕووناکییان لەنێو دەستدایە و، ھەر دەم ھیوای ڕووناکی و دەرکەوتنی خۆڕی ڕزگاری بە گەل و زێد و نیشتمانی کوردان دەبەخشن.
