بە داخێکی گرانەوە ئاگادار بووین ڕۆژی سێ شەممە ٢٦\١٢\١٣٩٩ی هەتاوی (١٦\٠٣\٢٠٢١ی زایینی) دوکتۆر کەماڵ مەزهەر ئەحمەد، خەباتگێڕ و مێژوونووسی گەورەی کورد دوای چەند ساڵ بەربەرەکانی دەگەڵ نەخۆشییەکی سەختی درێژخایەن لە تەمەنی ٨٤ ساڵ‌دا لە وڵاتی ئەڵمان کۆچی دوایی کرد و کەلێنێکی گەورەی لە دنیای ئەدەبی کوردی بە تایبەتی لە بواری مێژوونووسین‌دا لە دوای خۆی بەجێ هێشت.
دوکتۆر کەماڵ مەزهەر مێژوونووسی دەروەست و هاوچەرخی کورد لە ماوەی تەمەنی پڕبەرهەمی خۆی‌دا زۆر بابەتی بەپێز و پڕبایەخی مێژوویی خستنە نێو کتێبخانەی کوردی و بە هەزاران و دەیان هەزار بەڵگەنامەشی لە سەرچاوە باوەڕپێکراوەکانەوە کۆ کردبوونەوە کە خزمەتێکی گەورەن لە پێناو ساخکردنەوەی مێژووی کورددا.
کەماڵ مەزهەر هەرلەوکاتەدا تێکۆشەرێکی کورد بوو کە هەموو وەخت دەگەڵ ئێش و ئازاری گەلەکەی دەژیا. ساڵی ١٩٧٤ کاتێک دوای ناکام‌مانەوەی ڕێککەوتنی ئاداری ١٩٧٠ شەڕ لە کوردستان دەستی پێکردەوە، ئەو دەستی لە کاری مامۆستایی زانکۆ و هەموو ئیمکاناتی ژیان بەردا و چووە پاڵ شۆڕشی مافخوازانەی خەڵکی کوردستان تا دەگەڵ پێشمەرگە و بە ژیانی پێشمەرگایەتی بەکردەوە لە خزمەتی بەرەوپێشبردنی ئامانجە نیشتمانی و نەتەوەییەکانی‌دا بێ.
د. کەماڵ مەزهەر تا هەناسەی لەبەردا مابوو دۆستێکی ڕاستوێژی ڕێبەرانی حیزبی دێموکڕاتی کوردستان و پشتیوانێکی گەورەی داخوازە ڕەواکانی بزووتنەوەی کوردی خۆرهەڵات بوو. یادی بەخێر و ڕوحی شاد.
بە بۆنەی ئەو خەسارە گەورەیەوە پڕبەدڵ سەرەخۆشی و هاودەردی پێشکێشی هەموو ئەندامانی بنەماڵە بەڕێزەکەی بەتایبەتی شەهلاخان هاوسەری وەفادار و فیداکاری و هەموو خەڵکی کوردستان دەکەین و ئاواتەخوازین ڕێگاکەی بەردەوام بێ و قوتابییە بەئەمەگەکانی جێگای بەتاڵی پڕ بکەنەوە.
حیزبی دێموکراتی کوردستان
سکرتاریا
٢٧\١٢\١٣٩٩ (١٧\٠٣\٢٠٢١)
