لە حاڵێكدا ڕۆژانە كۆڵبەرانو كاسبكارانی كورد لە ناوچە سنوورییەكانی كوردستان بە گومانی پێبوونی كاڵاو شتوومەكی قاچاغ دەكەونە بەر دەستڕێژی ڕاستەوخۆی هێزە ئینتزامییەكانو دەكوژرێنو بریندار دەبن؛ وتەبێژی هەیئەتی سەرۆكایەتیی مەجلیس دەڵی هێنانی تانكێرەكانی چەكو چۆڵو مەشرووب لە لایەن یەخە سپییەكان هەروا بەردەوامە.
یەخەسپییەكان دەستەواژەیەكە بۆ كاربەدەستانی پلەبەرزی ڕێژیمو كاربەدەستانی ئەمنیەتی بەكار دهبرێ.
عەبدوڕەزا میسری، نوێنهری کرماشان له مهجلیسو ئهندامی ههیئهتی سهرۆکایهتیی مهجلیس لە لێدوانێكدا بۆ هەواڵدەریی حکومهتیی مێهر وێڕای ئاماژە بە زیانەكانی دەستێوەردانی دەوڵەت لە بهشی ئابووریدا دهڵێ دەبێ پێكهاتەی ئابووریی ئێران بەرەو كەرتی تایبەت هەنگاو بنێ.
ئەندامی هەیئەتی سەرۆكایەتیی مەجلیس لە هەمان حاڵدا پشتڕاستی كردەوە که سەرەڕای ڕێگری كردن لە هێنانی برینجە پیسو ژاوارییەكان، هاتنی تانكێرەكانی سووتەمەنی كە قاچاغی ناقانوونیی كەلوپەلو کاڵای دیکهیان پێدهکرێ هەروا بەردەوامەو؛ مەترسیی ئەوان یەكجار لە برینجە پیسەكان زیاترە.
میسری لهو بارهیهوه زیاتر دواوهو دهڵێ: ئەم سووتەمەنییە لە عێراقەوە هاوردە دەكرێو هیچ ڕوون نییە لە كوێ مۆڵەتی هاوردە كرانیان پێ دەدرێ، لەگەڵ ئەم تانكێرانەش، چەك و چۆڵ، مهشڕووبو كۆمەڵە كاڵایەكی دیكەی قاچاغ دێننه ئێرانهوه.
نوێنەری خەڵكی كرماشان لە مەجلیس پشتڕاستی كردەوە که ڕوون نیە قازانجی هاوردەكردنی ئەم سووتەمەنیو کاڵا قاچاغە دەچێتە گیرفانی كام یەك لە یەخە سپییەكان كە تەنانەت وەزیرو دهوڵهتیش ناتوانێ پێشیان پێ بگرێ.
پێشتریش باسی قاچاغو كاریگەریی ئەم مەسەلە لە نێو كاربەدەستە پلەبەرزەكانی ئێران هاتبۆ گۆڕێ. بۆ نموونە ساڵی ڕابردوو ڕهزا ڕەحمانیی فەزڵی، وەزیری نێوخۆی ئێران گوتبووی که “پووڵە پیسو قاچاغەكان” مەیدانی سیاسەتو گواستنەوەی دەسەڵاتیشیان پیس كردووە.
