بانگ‌كرانی خوێندكارانی ناڕازیی گەنجینەی هونەری كرماشان لە لایەن كۆمیتەی ئینزباتییەوە

خوێندكارانی ڕێكخراوی گەنجینەی هونەرو مێعماریی كرماشان كە ماوەیەك لەمەوبەر سه‌باره‌ت به‌ خراپ‌بوونی بارودۆخی كلاسەكان‌و نەبوونی ئیمكاناتی فێركاری ناڕەزایەتییان دەربڕیبوو، لەلایەن بەرپرسانه‌وه‌ بۆ كۆمیتەی ئینزباتییەوە بانگ كراون.
بەپێی ڕاپۆرتی هەواڵدەریی موكریان بەدوای ناڕەزایەتی دەربڕینی خوێندكارانی ڕێكخراوی گەنجینەی هونەری كرماشان لە بابەت بارودۆخی نالەباری ئەم ڕێكخراوەیه‌، كاربەدەستانی ئەم ڕێكخراوە لە ماوەی تاقیكاری‌یەكانی كۆتایی تێرم‌دا، داهێنانێكی سەیریان کردوه‌و لە لایەن كۆمیتەی ئینزباتی‌یەوە خوێندكارانی ناڕازییان بانگ کراون.
هەر بەپێی ئەم ڕاپۆرتە، ئەم خوێندكارانه‌ داوای مافی خۆیان كردووەو سەبارەت بە نەبوونی ئیمكانات ناڕەزایەتی‌یان دەربڕیوەو لە ئێستادا لە لووتكەی تاقیكاری‌یەکانی كۆتایی تێرم‌دا، تووشی دڵەڕاوكێی بانگ‌كرانی كۆمیتەی ئینزباتیش هاتوون.
بە قسەی سەرچاوەیەكی ئاگادار، لە ڕۆژانی داهاتوودا بە ئامادە بوونی سەرۆكی زانكۆو به‌رپرسانی پێوەندیدار بە مەبەستی لێكۆڵینەوە لەم خوێندكارانە، كۆبوونەوەیەك پێك دێنن.
ئەم خوێندكارانە هەروەها دەڵێن ئێمە بە هیچ شێوەیەك نەزمی ئەم ڕێكخراوەمان نەشێواندووە، بەڵام ئەم ناوه‌نده‌ زانستی‌یه‌ داواكردنی مافەكانمان بە فیتنە دەزانێ‌و كۆمیتەی ئینزباتیی بە مەبەستی لێپێچینەوە بانگمان دەكا.