هێزەکانی جەیشولعەدل کە گرووپێکی چەکداری بەلووچە، لە سەراوان هێرشیان کردووەتە سەر سپای پاسدارانی کۆماری ئیسلامی و ٥ پاسدارکوژران و ٣ پاسداریش بە دیل گیران.
بەپێی سەرچاوە خۆجێییەکان و کاناڵی هەواڵی “ڕەسەدی بەلووچستان” ڕۆژی سێشەممە ١٢ی ڕەشەمەی ٩٩هەتاوی، هێزەکانی “جەیشولعەدل”لە ناوچەی “بەمپۆشت”ی سەراوان هێرشیان کردۆتە سەر دوو ماشێنی چەکدارانی سپای پاسداران و لەو هێرشەدا ٥پاسداری سپای پاسداران کوژراون و ٣ چەکداری سپایش بە دیل گیراون.
جەیشولعەدل بە بڵاو کردنەوەی بەیاننامەیەک ئەو هێرشەی وەئەستۆی گرت و گوتی: لەو هێرشەدا بۆسەر سپای پاسداران ٥کەس لە چەکدارانی سپا کوژراون و ٣چەکداری دیکەشیان بەدیل گیراون، بەڵام سپای پاسدارن وەک هەمیشە بۆ چەواشەکاری ڕایگەیاندووە کە، تەنیا یەک کەس لە چەکدارەکانیان بریندار بووە و چەکدارێکی دیکەشیان بێ‌سەروشوێنە.
هەرلەم بارەیەوە “محەممە مەرعێشی” جێگری ئاسایشی ئینتزامی پارێزگای سیستان‌و‌بەلووچستان ئەو هەوالەی پشتڕاست کردەوە و گوتی: ئەو هێرشە لە ناوچەی “بەممپۆشت”ی سەربە شاری سەراوان ڕوویداوە و ئەو ماشێنانەی کە هێرشیان کراوەتە سەر ماشێنی هێزەکانی سپای پاسداران بوون.
هەر لەو پێوەندییەدا کەمپەینی چالاکانی مافی مرۆڤی ئێران ڕایگەیاند، دوای گیان لەدەستدانی ٨ کەس لە خەڵکی بەلووچستان بە تەقەی ڕاستەوخۆی سپای ریژیم و لە ئاکامی خۆپێشاندان و ناڕەزایەتیی‌دەربڕینی خەڵکی بەلووچستان بەو جینایەتەی ڕیژیم ٢٣ کەسی مەدەنیی بە تەقەی هێزە سەرکوتکەرەکانی کۆماری ئیسلامیی لەو پارێزگایە گیانیان لەدەستداوە.
