کۆماری ئیسلامی ساڵێک لەمەوبەر بەڵێنی دابوو کە لە شاری ئیلام “سینەما”یەک بەناوی “ئومید” دروست بکا، بەڵام یەکساڵ تێپەڕیوە و هیج گرینگییەک بەو پڕۆژەیە نەدراوە و پارێزگای ئیلام تا ئێستا سینەمای نییە.
کۆماری ئیسلامیی ئێران بە نیسبەت پارێزگاکانی کوردستان بەگشتی و پارێزگای ئیلام بە تایبەتی، نەک هەر کەمتەرخەمە بەڵکوو پەراویزیان دەخا و هیچ خزمەتگوزارییەکی دابین نەکردووە و دوای یەک ساڵ لە بەڵێنی دەسەڵاتدارانی ڕێژیم، خەڵکی ئیلام تا ئێستاش لە بوونی “سینەما” لە پارێزگاکەیان بێبەشن.
یەک ساڵ بەسەر بەڵێنەکانی دەوڵەتی کۆماری ئیسلامیی ئێراندا تێدەپەڕێ کە بەڵینی دابوو سینەمایەک بۆ پارێزگای ئیلام دروست بکات، بەڵام تا ئێستا هیچ هەنگاوێکی بۆ دروستکردنی نەناوە و تەنیا بۆ ئەوەی خۆڵ لەچاوی خەڵک بکات هەندێ کاری لەو پڕۆژەیەدا کردووە و بەجێی هێشتووە و خەڵکی پارێزگای ئیلام نیگەرانن لەوەیکە لەهەموو پاریزگاکانی دیکەی ئێران سینەما هەیە بەڵام لە پاریزگای ئیلام ڕێژیم گرینگی بەو خواستە کەلتوورییەی خەڵک نادات.
جێی ئاماژەیە کە پارێزگای ئیلام دەوڵەمەندە بە کانزا ژێرزەوییەکان و سەرچاوەکانی نەوت، گاز و کانگای جۆراوجۆر، بەڵام ڕێژیمی ئێران هەموو داهاتی ئەو پاریزگایە دەگوازیتەوە بۆ شار و پاریزگاکانی دیکەی ئێران و کەمترین داواکاریی خەڵکی ئەو پارێزگایە کە هەبوونی سینەمایە دابین ناکات.
