کۆڕی ڕاوێژکاری چالاکانی مەدەنیی یارسان بە دەرکردنی بەیاننامەیەک کوژرانی کۆڵبەران و کاسبکارانی کوردستان و بەلووچستانیان مەحکووم کرد.
کۆڕی ڕاوێژکاری چالاکانی مەدەنیی یارسان لە بەیاننامەیەکدا سەبارەت بە کوژرانی کۆڵبەران و کاسبکارانی کوردستان و بەلووچستان نووسیان: سیستان و بەلووچستان کە زێدی زۆرێک لە کەسایەتییە ناودارەکانی ئێران، ئەنباری پێشووی دەغڵودان و شوێنی ژیانی ئازادیخوازانە بووە ئەمڕۆ لە ئاگری سیاسەتی هەڵاواردنی کاربەدەستانی ئەو ڕێژیمە بووە بە شارێکی سووتاو، بەشێوەیەک کە دانیشتووانی بۆ وەدستهێنانی بژێوی ژیانی ڕۆژانەیان گیانی ئازیزانیان دەخەنە مەترسییەوە و مافیاکانی دەسەڵات و سەروەت، گەنجانی برسیی ئەو ناوچانە لە خاک و خوێن وەردەدەن هەروەک چۆن خوێنی کۆڵبەرانی کوردستان، ساڵانێکە کێو و گاشە بەردە بەفراوییەکانی کوردستانیان ڕەنگین کردووە.
کۆڕی ڕاوێژکاری چالاکانی مەدەنیی یارسان بە مەحکوومکردنی کوژرانی کاسبکارانی سیستان و بەلووچستان و کۆڵبەرانی کوردستان، ڕوو بە دەسەڵاتدارانی کۆماری ئیسلامی ڕادەگەیەنێ: ئەوەیکە ئەمڕۆ لە سیستان و بەلووچستان و کوردستان، بەگشتیی لە سەرتاسەری ئێران بەسەر خەڵکی هەژار و برسی دێ، ئاکامی سیاسەتی ناکارامەی ئێوە و پەرەپێدان بە گەندەڵیی، دزی و بەتاڵان بردنی سەروەت و دارایی گەلانی ئێران لەلایەن بەرپرسانی ئێوەیە، بۆیە بەم هۆیەوە شێلگیرانە خوازیاری ڕاگرتنی توندوتیژیی و هەڵاواردن بەدژی خەڵکی هەژارین و داواکارین بکەرانی ئەو کردەوە ناڕەوایانە سزا بدرێن و خوازیاری ڕەچاوکردنی سیاسەتی خێرا لە پێوەندی لەگەڵ لەنێوبردنی هەژاری و هەڵاواردنی ناوچە ماف خوراوەکان بە تایبەت سیستان و بەلووچستانین.
کۆڕی ڕاوێژکاری چالاکانی مەدەنیی یارسان ١٠ی ڕەشەمەی ٩٩ی هەتاوی.