لە مانگی بەفرانباری ٩٩ی هەتاوی کۆمەڵێ چالاکی مەدەنیی، ژینگەپاریز و فەرهەنگیی لەلەیەن هێزە چەکدارەکانی ڕێژیمی تارانەوە دەسبەسەرکرابوون تا ئێستاش زۆربەیان چارەنووسیان نادیارە.
لە ماوەی چەند ڕۆژی ڕابردوودا ۱۰ چالاکی دەستبەسەرکراو لە بەندیخانەی ئیتلاعاتی ورمێ گوازرانەوە بۆ بەندیخانەکانی ناوەندى ورمێ و مەهاباد، ژمارەیەک لە بنەماڵەی ئەو چالاکە دەسبەسەرکراوانە لە شارەکانی مەهاباد، بۆکان، سنە، سەوڵاوا و مەریوان وێڕای نیگەرانییدەربڕین لەسەر چارەنووسی منداڵەکانیان، خوازیاری گوشاری ناوەند و ڕێکخراوە نێونەتەوەیی و جیهانییەکان بوون بۆ ڕزگارکردنیان لە بەندیخانە.
به وتەی بنەماڵەى دەسبەسەر کراوان، منداڵەکانیان لە بەندیخانەی ئیدارەی ئیتلاعات و ڕێکخراوی ئیتلاعاتی سپای پاسداران لە شارەکانی ورمێ، سنە و مەریوان چاودێری دەکرێن و تا ئێستا هیچ زانیارییەک لە هۆکاری دەسبەسەرکردنیان لە بەردەستدا نییە و پاش بەدواداچوونی بنەماڵەکانیان، لە لایەن دادگای شارەکانەوە پێیانوتراوە بۆ دووەمین مانگیش دەسبەسەرکردنی ئەم بەندکراوانە درێژ بووەتەوە.
جێی ئاماژەیە کە، لە چەند حەوتووی ڕابردوو، عەزیمە ناسری، حوسێن گەردەشی، سۆران حوسێنزاده، سیروان نوری، ئیمان عەبدی، ئەفشین مامئەحمەدی، فەرهاد مووساپور، فەرەیدون مووساپور، بەهمەن یوسفزاده و شەپۆل خزری لە بەندیخانەی ئیتلاعاتی سپای تێرۆریستی پاسداران بۆ بەندیخانەی ناوەندیی ورمێ گوازرانەوە.