نزیكەی ١٠ كۆڵبەر لە شاری مەهاباد لە لایەن هێزە ئینتزامییەكانەوە دەستبەسەرو بۆ شوێنێكی نادیار ڕاگوێزراون.
بەپێی ڕاپۆرتی ماف نیوز، ڕۆژی یەكشەممە ٢٠ی بەفرانباری ١٣٩٤ی هەتاوی، هێزە ئینتزامییەكانی كۆماری ئیسلامیی ئێران لە شاری مەهاباد، هەڵیانكوتاوەتە سەر باغی میكایل لەم شارەو، كۆمەڵێك لە كاسبكارانیان دەستبەسەر كردوە كە لەم شوێنە كۆ بوونەوە.
بەپێی ئەم ڕاپۆرتە، مەئموورە ئینتزامییەكان بە هێرشكردن بۆسەر ئەم پاركە که بە باغی میكایل ناسراوە، وێڕای ئازارو ئەزیەتی ئەم كاسبكارانەی كە لەوێ بوون، ١٠ كەس لەوانیان قۆڵبەست كردوه، ئەوە لە حاڵێك دایە كە زۆربەی ئەم كاسبكارانە لە چینی هەژارو كەم داهاتی كۆمەڵگان.
تا كاتی ئامادە كردنی ئەم هەواڵە هیچ زانیارییەكی وردو دەقیق سەبارەت بە بارودۆخی ئەم گیراوانە لە بەر دەستدا نیە، بەڵام دەگوترێ هەموو ئەم كەسانە لە ناوچە سنوورییەكان خەریكی كاری كۆڵبەری بوون.