پێشنوێژی کاتیی ئیسفەهان دەڵێ: دووچەرخەسواریی ژنان وەکوو گرانبوونی شتومەک و پێداویستییەکانی ژیان بۆتە کێشەی سەرەکیی و دەبێ بە زووترین کات چارەسەر بکرێ.
محەممەد تەقی ڕەهبەر، پێشنوێژی ئیسفەهان وتی: کێشەی گرانبوونی شتومەک و پیداویستییەکانی ژیان نابێتە هۆی ئەوەیکە لەهەمبەر کارە نەشیاوەکانی دیکە بێ هەڵوێست بین و دووچەرخە سواری ژنانیش وەکوو گرانبوونی شتومەک و پێداویستییەکانی ژیان بۆتە کێشەیەکیی گشتیی و کارێکی نەشیاوە کە لە کۆمەڵگەی ئێمەدا قبووڵ ناکرێ و دەبێ چارەسەر بکرێ.
ناوبراو دەڵێ: کاتێک هەموو پێشنوێژەکان ناڕازین لە دووچەرخەسواریی ژنان لە پێش چاوی گەنجان و پیاوەکانەوە کێشەیەک هەیە و دەبێ بەخێرایی چارەسەر بکرێ.
هەرلەم پێوەندییەدا ئەبولحەسەن مەهدەوی، نوێنەری ئیسفەهان لە مەجلیسی خوبرێگان، سەرەڕای ڕەخنەگرتن لە هەوڵەکانی شارەوانی لەهەمبەر دووچەرخەسواریی ژنان وتی: دووچەرخە سواری ژنان کێشەیەکیی گەورەیە و ئێمە ناتوانین ئەم بێڕێزییە قەبووڵ بکەین.
ناوبراو بەزمانێکی توند و هەڕەشاوییەوە وتبووی ئەگەر بەرپرسانی دەوڵەت ڕووبەڕووی دووچەرخە سواری ژنان نەبنەوە ئێمە بۆ خۆمان بە شێوەیەکیی دیکە چارەسەری دەکەین.
