سەدی ٧٢ی یەكە پیشەسازییەكانی كرماشان بە كەمتر لە نیوەی زەرفییەتی خەریكی کار و وەبەرهێنانن.
شاهپوور قەنبەری، بەڕێوەبەری گشتیی شیركەتی شارۆچكە سەنعەتییەكانی پارێزگای كرماشان وێڕای ئاماژە بەم مەسەلە كە تەنیا سەدی ١٨ی یەكە پیشەسازییەكانی شارۆچكەی سەنعەتی ئەم پارێزگایە بە زەرفییەتی زیاتر لە سەدی ٧٠ی ئاستی بەرهەمهێنانیان خەریكی كار و وەبەرهێنانن؛ وەبیری هێنایەوە كە لە ئێستادا بارودۆخی تەنیا ٦٠ كارگە لە ٢١٥ یەكەی چالاكی شارۆچكە سەنعەتییەكان لە دۆخێكی باش دان و ئەوانی دیكە كەمتر لە سەدی ٥٠ی بارستایی خۆیان چالاكی دەكەن.
بەڕێوەبەری گشتیی شیركەتی شارۆچكە سەنعەتییەكانی پارێزگای كرماشان وێڕای ئاماژە بە نەبوونی سەرمایەی وەگەڕخراو بە ڕادەی پێویست، گرینگترین هۆكاری شكانو داخرانی ئەم یەكانەی بۆ ئەم مەسەلە گەڕاندەوە و گوتی: نەبوونی بازاڕی فرۆشتن بۆ بەرهەمە نێوخۆییەكان، بەڕێوەبەرایەتیی خراپ، پێكهاتەی سوننەتیی بەرهەمهێنان، ناتەواو بوونی قانوونەكان، بوونی گەمارۆكان و لاواز بوونی فەرهەنگی كار لە هۆكارەكانی دیكەن كە بواریان بۆ داخرانی ئەم یەكانە ڕەخساندووە.
قەنبەری پێی وایە زۆربەی ئەم یەكانەی كە داخراون، یەكە شیمیاییەكانو بەرهەم هێنەرانی شتوومەك و کاڵای خواردەمەنی بوون و دەڵێ: زۆر بوونی ئاستی داخرانی كارگەو كارخانەكان و ناتوانا بوونی خاوەنانی ئەم یەكە بەرهەم هێنەرانە بۆ بەردەوام بوون لە كارەكانیان، تەنیا پێوەندی بەم ساڵەوە نییە و ماوەی چەند ساڵێکە كە ئەم بارودۆخە هەروا بەردەوامە.
