کۆڵبەرێکی لاوی خەڵکی بۆکان کە بە مەبەستی کۆڵبەری چووبووە سنووری بانە، بە هۆی سەرماوە گیانی لەدەسدا.
بەرەبەیانی ڕۆژی چوارشەممە ٢٩ی ڕێبەندانی ٩٩ی هەتاوی، کۆڵبەرێکی خەڵکی بۆکان بە ناوی “شارام قادری” خەڵکی گوندی وشتەپەی سەر بە بۆکان، لە چیاکانی بانە بە هۆی سەرماوە گیانی لەدەسدا.
لە لایەکی دیکەوە ڕۆژی دووشەممە ٢٧ی ڕێبەندان کۆڵبەرێک بە ناوی “یوسف وەتەن دوست” خەڵکی مەریوان لە بەرزاییەکانی “تەتەی” هەورامان هەڵدێرا و بە سەختیی بریندار بوو و گوازرایەوە بۆ نەخۆشخانەی شاری مەریوان و لە ژێر چاوەدێریی چڕی پزیشکیدایە.
لە ماوەی مانگی ڕابردوودا لانیکەم ٨ کۆڵبەر لە سنوورەکانی ورمێ، بانە، هەورامان و سەوڵاوا بە هۆی ڕووداوی وەک هەرەسی بەفر و سەرمابردوویی و هەڵدێران لە بەرزایییەوە گیانیان لە دەست داوە.
