خاتوو مەلەک عومەربیل ژنە نیشتمانپەروەر و دڵسۆزی حیزبی دێموکراتی کوردستان لە ناوچەی چۆمی مەجیدخان دڵە پڕ لە هیواکەی لە لێدان کەوت.
بەپێی هەواڵی گەیشتوو بە ناوەندی ڕاگەیاندنی حیزبی دێموکراتی کوردستان، ڕۆژی هەینی ٢٤ی ڕێبەندانی ٩٩ی هەتاوی، خوشکە مەلەک عومەربیل خوشکی شەهید جەعفەر عومەربیل، لە شارەدێی سەرچناری ناوچەی چۆمی مەجیدخان ماڵاوایی لە ژیان کرد.
خوشکە مەلەک ژنێکی تێکۆشەر و سەوداسەری نیشتمان بوو، هەر لە هەڕەتی لاوێتییەوە فڕچکی بە نیشتمانپەوەری و کوردایەتییەوە گرتبوو و هۆگری ڕێبازی حیزبی دێموکرات بوو، هەمیشە ئاواتی ئەوە بوو وەکوو پێشمەرگە لە ڕیزی خەباتدا بێ بەڵام بەهۆی هەندێ هۆکار نەیتوانی.
ناوبراو تەنیا لەبەر براشەهیدەکەی نەبوو کە ئاوا هۆگری نیشتمان ببوو، بەڵام دوای شەهید بوونی برا گەورەکەی ئیدی بەوپەڕی شانازییەوە شانی وەبەر ئەرکە نیشتمانی کوردپەروەرییەکانی دابوو.
لەلایەن ناوەندی ڕاگەیاندنی حیزبی دێموکراتی کوردستانەوە بەبۆنەی کۆچی دوایی خاتوو مەلەک پرسە و سەرەخۆشی خۆمان ئاراستەی بنەماڵە و کەسوکاری خوشکە مەلەک دەکەین و خۆمان بە شەریکی خەمیان دەزانین.