گرووپێكی پارێزەری مافەكانی مرۆڤی توركیە دهڵێن لە مانگی گەلاوێژی ساڵی ٩٤ بەملاوە لانیكەم ١٦٢کهسی مەدەنی لە عەمەلیاتی ئەرتەشی توركیە بۆسەر ناوچە جۆربەجۆرەكانی باكووری كوردستاندا گیانیان لە دەست داوە.
ناوەندی مافەكانی مرۆڤی توركیە لە بەیاننامەكەی خۆیدا نووسیویەتی: لەنێو ئەم كوژراوانەدا ٣٢ کهسیان مناڵ، ٢٩ کهسیان ژنو ٢٤ كەسیان بەساڵاچوو بوون كە بههۆی شهڕی ئەرتەشی توركیە لەگەڵ هێزەكانی پارتی كرێكارانی كوردستان (پ ك ك) لە ناوچەکانی وەك جزیرە و ناوچەی مێژوویی سور لە ئامەد كوژراون.
بەم حاڵەش ئەرتەشی توركیە ڕایگەیاندووە كە لە ماوەی كەمتر لە یهک مانگی ڕابردوودا، زیاتر لە ٢٠٧ كەس لە ئەندامانی پ ك ك لە باكووری كوردستان بە دەستی هێزەكانی ئەوان كوژراون.
ماوەیەكە دەوڵەتی توركیە هاوكات لەگەڵ ڕاگەیەندنی حكوومەت نیزامی لەم ناوچانە، هێرشی كردۆتە سەر بنكەو بارەگاكانی پارتی كرێكارانی كوردستان.
مانگی ڕابردوو، ڕەجەب تەیب ئەردۆغان سەركۆماری توركیە گوتی لە سەرەتای هێرشەكانی ئەرتەشی ئەم وڵاتە بۆسەر “پ ك ك” پتر لە ٣١٠٠ گریلا لە توركیەو لە ناوچه شاخاوییهکانی ههرێمی کوردستان كوژراون.
سەركۆماری توركیە ماوەیەك لەمەوبەریش گوتبووی لە توركیە هیچ پرسێک بە ناوی پرسی كورد له ئارادا نییەو ئەرتەشی توركیە تەنیا لەگەڵ تێرۆریستەكان لە بەرەی شەڕ دایە؛ بەڵام زۆربەی ناوەندەكانی مافی مرۆڤ بەدژی ئەم بیروبۆچوونەی سەركۆماری توركیەنو دەڵێن دەڵەتی ئەردۆغان تەنیا بەشوێن سەركوتی هێزە كوردییەكانی ئەم وڵاتە دایە.
