موحسێن سەفایی فەراهانی، چالاکی سیاسیی دەڵێ: هەموو هێز و دەسەڵاتی ئێران لە بەردەست خامنەییدایە و تەنیا لە سەتا ٢٠ی هێز و دەسەڵات بۆ سەرۆککۆمارە.
سەفایی فەراهانی چالاکی سیاسیی ڕێفۆرمخواز لە وتووێژێکدا لەگەڵ ڕۆژنامەی شەرق، بە ئاماژە بە کێشەوگرفتە بەردەوامەکانی دەوڵەت وتی: سەرۆککۆمار کە دەبێتە سەرۆکی دەوڵەت لە ئێستا تەنیا لەسەتا ٢٠ی دەسەڵاتی بەڕێوەبەریی وڵاتی بەدەستەوەیە و دیاریکردنی ستراتیژی و پلانی درێژماوە لە دەسەڵاتی سەرۆککۆماردا نییە.
ناوبراو بە ئاماژە بە دەسەڵاتی خامنەیی وتی: دەسەڵاتی خامنەیی لە ئێراندا لە سێ دەزگای سەرەکیی ڕێژیم زۆر زیاترە و هەموو سیاسەتە گرینگ و چارەنووسسازەکانی وڵات بە بڕیاری خامنەیی جێبەجێ دەبێ و لە وەها دەسەڵاتێکی بەرفراواندا سەرۆککۆمار و دەزگاکانی دیکەی وڵات هیچ دەسەڵاتێکیان نییە.
سەفایی لەدرێژەدا وتی: لە وڵاتێکدا کە هەموو دەسەڵاتەکان و ستراتیژیی و پلانی درێژماوە و سیاسەتەکانی دەرەوەی وڵات و تەنانەت بەڕێوبەریی نێوخۆی وڵات لە دەست خامنەییدا دەبێ، هەڵبژاردن هیچ مانایەکی نییە و تەنیا چەواشەکردنی ڕاستییەکانە.